Şimali Koreya lideri Kim Çen Inın beyin qanaması keçirərək komaya düşdüyü və təcili tibbi yardım üçün Çinə aparıldığı barədə sosial şəbəkələrdə iddialar yayılıb. Lakin bu məlumatlar rəsmi mənbələr tərəfindən təsdiqlənməyib. Şimali Koreya dövlət mediası isə ölkə liderinin ictimai tədbirdə iştirak etdiyini göstərən yeni görüntülər yayımlayıb.
MSNews.az xəbər verir ki, oktyabrın 18–19-da yayılan iddialara əsasən, Kim Çen Inın səhhəti qəfil pisləşib və onun xüsusi təyyarə ilə Pekinə aparıldığı irəli sürülüb.
Britaniyanın “The Sun” nəşri sosial şəbəkələrdə yayılan məlumatlara istinadən Şimali Koreya liderinin beyin qanaması keçirdiyi və komaya düşdüyü barədə iddiaları işıqlandırıb.
İddialara görə, Kim Çen In Çinin paytaxtındakı xəstəxanalardan birində müalicə olunur. Lakin onun xəstəxanaya yerləşdirilməsinə, komada olmasına və ya Çinə aparılmasına dair müstəqil təsdiqlənmiş sübut təqdim edilməyib.
Cənubi Koreyanın “Yonhap” agentliyinin məlumatına görə, Koreya Mərkəzi Xəbər Agentliyi (KCNA) Kim Çen Inın oktyabrın 19-da Pxenyanda keçirilən Milli Geyim və Ayaqqabı Sərgisini ziyarət etdiyini açıqlayıb.
Yayımlanan fotolarda Şimali Koreya liderinin həyat yoldaşı Ri Sol Cu və qızı Kim Çu E ilə birlikdə sərgiyə baxdığı görünür.
Nəşr vurğulayıb ki, liderin ağır xəstə olması barədə iddialar əvvəlcə sosial şəbəkələrdə sübut təqdim edilmədən yayılıb.
Kim Çen Inın mümkün varisliyi məsələsi də yenidən müzakirə mövzusuna çevrilib.
Onun bacısı Kim Yo Con Şimali Koreyanın siyasi rəhbərliyində nüfuzlu şəxslərdən biri hesab olunur. O, xüsusilə Cənubi Koreya və ABŞ ilə münasibətlərə dair sərt bəyanatları ilə tanınır.
Lakin Kim Yo Conun rəsmi varis elan edildiyinə dair məlumat yoxdur. Kim Çen Inın qızı Kim Çu Enin yüksək səviyyəli dövlət tədbirlərində görünməsi də gələcək rəhbərliklə bağlı müzakirələrə səbəb olur.
Qeyd edək ki, Şimali Koreya liderinin səhhəti barədə əvvəllər də oxşar şayiələr yayılıb. 2020-ci ildə onun uzun müddət ictimaiyyət qarşısına çıxmaması ağır xəstə olması və hətta ölümü barədə iddialara səbəb olmuşdu. Daha sonra Kim Çen In yenidən ictimai tədbirdə görüntülənmişdi.
