Noyabrın 9-da Türkiyənin Antalya şəhərində BMT-nin İqlim Dəyişmələri üzrə Çərçivə Konvensiyasının 31-ci Tərəflər Konfransının (COP31) rəsmi açılış mərasimi keçirilib. Bununla da qlobal iqlim danışıqlarına sədrlik Türkiyəyə keçib.
MSNews.az xəbər verir ki, konfransın açılış mərasimi Antalya EXPO Mərkəzində təşkil olunub. Tədbirdə müxtəlif ölkələrin nümayəndələri, beynəlxalq təşkilatların təmsilçiləri, ekspertlər və vətəndaş cəmiyyəti üzvləri iştirak edirlər.
COP31-ə Türkiyənin ətraf mühit, şəhərsalma və iqlim dəyişikliyi naziri Murat Kurum sədrlik edəcək. Konfrans çərçivəsində rəsmi iqlim danışıqlarına isə Avstraliyanın iqlim dəyişikliyi və energetika naziri Kris Bouen rəhbərlik edəcək. Bu bölgü Türkiyə və Avstraliya arasında əldə olunmuş razılaşmaya əsaslanır.
Noyabrın 20-dək davam edəcək konfransda iqlim maliyyələşdirilməsi, istixana qazı emissiyalarının azaldılması, bərpaolunan enerji mənbələrinə keçid, ərzaq təhlükəsizliyi və iqlim dəyişmələrinə uyğunlaşma kimi məsələlər əsas müzakirə mövzuları olacaq. Xüsusilə inkişaf etməkdə olan ölkələrin iqlim tədbirlərinin maliyyələşdirilməsi diqqət mərkəzindədir.
Noyabrın 11–12-də Antalyada Dünya Liderlərinin İqlim Sammiti keçiriləcək. Sammitdə dövlət və hökumət başçılarının iştirakı, qlobal iqlim siyasətinin gələcək istiqamətləri barədə çıxışların edilməsi nəzərdə tutulur. Açılış sessiyasına Türkiyə Prezidenti Rəcəb Tayyib Ərdoğan rəhbərlik edəcək.
Qeyd edək ki, COP31-dən əvvəlki iqlim konfransı – COP30 2025-ci ildə Braziliyanın Belem şəhərində, COP29 isə 2024-cü ildə Azərbaycanın paytaxtı Bakıda keçirilib. Antalya konfransı əvvəlki toplantılarda qəbul olunmuş iqlim öhdəliklərinin həyata keçirilməsi istiqamətində danışıqları davam etdirəcək.
