Argentina futbolunda inanılmaz hadisə yaşanıb. “Rosario Sentral”ın futbolçuları və azarkeşləri çempionluğu qazandıqlarını düşünərək meydanda bayram etməyə başlayıblar. Lakin paralel keçirilən qarşılaşmada “Boka Xuniors”un son saniyələrdə vurduğu qol onların sevincini məyusluğa çevirib.
MSNews.az xəbər verir ki, hadisə noyabrın 7-də Argentina çempionatının illik turnir cədvəlinin qalibinin müəyyənləşdiyi son turda baş verib.
Bu barədə “La Nación” və “Infobae” məlumat yayıb.
“Rosario Sentral” öz meydanında “Estudiantes de Rio Kuarto”nu 2:0 hesabı ilə məğlub edib. Qolları Xulian Fernandes və Emanuel Koronel vurublar. Çempionluğu təmin etmək üçün isə komandanın əsas rəqibi “Boka Xuniors”un paralel görüşdə xal itirməsi lazım idi.
“Boka Xuniors”un “Defensa i Xustisiya” ilə oyunu uzun müddət qolsuz davam edib. Rosarioda rəqib qarşılaşmanın 0:0 hesabı ilə başa çatdığı barədə yanlış məlumat yayılıb. Bundan sonra futbolçular və azarkeşlər çempionluğu bayram etməyə başlayıblar. Bəzi tərəfdarlar meydana daxil olub, oyunçular isə tribunalar qarşısında sevinclərini bölüşüblər.
Lakin həmin vaxt “Boka Xuniors”un görüşü hələ yekunlaşmamışdı. Ekvadorlu hücumçu Enner Valensiya 90+5-ci dəqiqədə qol vuraraq komandasına 1:0 hesablı qələbə qazandırıb. Beləliklə, Buenos-Ayres təmsilçisi illik turnir cədvəlinin qalibi olub.
Çempionluq sevincinin ardından “Rosario Sentral”ın stadionuna yayılan ziddiyyətli məlumatlar qarışıqlıq yaradıb. Əvvəlcə “Boka Xuniors”un qolunun ləğv edildiyi düşünülsə də, sonradan onun qüvvədə qaldığı təsdiqlənib. Az əvvəl çempionluğu bayram edən futbolçuların bir qismi göz yaşlarına boğulub.
Nəticədə “Boka Xuniors” 63 xalla birinci, “Rosario Sentral” isə 62 xalla ikinci yeri tutub. “Boka Xuniors” bununla 2026-cı ilin illik turnir cədvəlinin çempionu adını qazanıb və 2027-ci il Libertadores Kubokunun qrup mərhələsinə vəsiqə əldə edib.
Qeyd edək ki, bu titul Argentinanın Apertura və Klausura turnirlərinin ümumi nəticələrinə əsaslanan ayrıca illik çempionluqdur. Buna görə hadisəni “Boka Xuniors”un 36-cı ölkə çempionluğu kimi təqdim etmək dəqiq deyil.
