Rumıniya Futbol Federasiyası (FRF) uşaq və yeniyetmələrin oyunlarında tribunadan gələn təhqir, təzyiq və aqressiyanın qarşısını almaq məqsədilə yeni “qara kart” qaydasını tətbiq edib. Qaydaya əsasən, xəbərdarlıqlara baxmayaraq davranış davam edərsə, hakim matçı birdəfəlik dayandıra biləcək.
MSNews.az xəbər verir ki, yeni prosedur U7-dən U16-dək yaş kateqoriyalarında keçirilən yarışları əhatə edir və 2026/27 mövsümündən qüvvədədir. Rumıniya Futbol Federasiyası bildirir ki, məqsəd uşaqları tribunadakı böyüklərin təzyiqindən, təhqirlərindən və aqressiyasından qorumaqdır.
Yeni qayda üç mərhələdən ibarətdir. Əvvəlcə hakim oyunu müvəqqəti saxlayaraq məşqçilərdən valideyn və azarkeşlərlə danışmağı və yolverilməz davranışın dayandırılmasını tələb edir.
Davranış davam edərsə, matç 10 dəqiqəlik dayandırılır, futbolçular soyunub-geyinmə otaqlarına göndərilir və vəziyyəti sakitləşdirmək üçün ikinci cəhd edilir.
Oyunun bərpasından sonra da təhqir və ya aqressiya davam edərsə, hakim final fitini səsləndirir və qara kart göstərərək qarşılaşmanı birdəfəlik dayandırır. Belə matç həmin anda artıq davam etdirilə bilməz.
Qayda təkcə söyüş və təhqirləri əhatə etmir. Futbolçulara, məşqçilərə və hakimlərə qarşı verbal və fiziki zorakılıq, valideynlərin hətta öz övladlarını vurması və ya itələməsi, eləcə də azarkeş və valideynlər arasında münaqişələr də prosedurun tətbiqinə səbəb ola bilər. “Europa FM” da qaydanın məhz tribunadakı aqressiv davranışların qarşısını almağa yönəldiyini bildirir.
FRF bu addımı uşaqların futbolu böyüklərin ambisiyası və aqressiyası ilə deyil, sağlam inkişaf və oyun mühiti ilə əlaqələndirməsi üçün atdığını vurğulayır.
