Türkiyənin İstanbul, Burdur və Ordu vilayətlərində FETÖ təşkilatının hüquq-mühafizə orqanları daxilindəki gizli şəbəkəsinə qarşı genişmiqyaslı əməliyyat keçirilib. Eyni vaxtda 15 ünvanda aparılan əməliyyat-axtarış tədbirləri nəticəsində 15 şübhəli şəxs saxlanılıb. Onların arasında hazırda dövlət qurumlarında çalışan və əvvəllər dövlət qulluğundan xaric edilmiş şəxslər də var.
MSNews.az xəbər verir ki, bu barədə oktyabrın 20-də Türkiyənin “Anadolu” agentliyi məlumat yayıb.
Məlumata əsasən, əməliyyat İstanbul Baş Prokurorluğunun koordinasiyası ilə İstanbul Polis İdarəsinin Qaçaqmalçılıqla Mübarizə Şöbəsinin əməkdaşları tərəfindən həyata keçirilib.
İstintaq çərçivəsində Türkiyə hakimiyyətinin FETÖ/PDY adlandırdığı təşkilatın hüquq-mühafizə orqanlarındakı gizli strukturlarında fəaliyyət göstərməkdə şübhəli bilinən şəxslərin müəyyənləşdirilməsi istiqamətində araşdırmalar aparılıb.
Araşdırma zamanı gizli şahiddən əldə edilən rəqəmsal məlumatlar, bank hesabları üzrə əməliyyatlar, maliyyə köçürmələri və telefon danışıqlarının qeydləri təhlil edilib.
İstintaq orqanlarının məlumatına görə, şübhəli şəxslərin “Bank Asya” bankındakı hesablarında müəyyən tarixlərdə qeyri-adi məbləğ artımları qeydə alınıb.
Bundan başqa, onların FETÖ ilə əlaqəli olduğu bildirilən qurumlara qurban, təqaüd və ianə adı altında pul köçürdükləri iddia olunur.
Türkiyənin “Demirören Haber Ajansı”nın məlumatına görə, istintaq zamanı ictimai telefon aparatlarından edilən ardıcıl zənglərin qeydləri də araşdırılıb. Hüquq-mühafizə orqanları bu cür zəngləri təşkilatın gizli əlaqələndirmə üsullarından biri hesab edir.
Qeyd edək ki, Türkiyə hakimiyyəti FETÖ-nü 2016-cı il iyulun 15-də baş vermiş dövlət çevrilişinə cəhddə məsuliyyət daşıyan terror təşkilatı hesab edir. Təşkilatla əlaqədə şübhəli bilinən şəxslərə qarşı ölkədə müxtəlif dövrlərdə əməliyyatlar həyata keçirilib.
Hazırkı əməliyyatda saxlanılan şəxslərin təqsiri barədə yekun məhkəmə qərarı yoxdur. İstintaq davam edir.
