“Apple” iOS 27-də eyni telefon nömrəsinin iki fərqli iPhone arasında istifadə edilməsinə imkan verən “iPhone Handoff” funksiyasını təqdim etməyə hazırlaşır.
MSNews.az xəbər verir ki, yeni sistem istifadəçilərə SIM və ya eSIM-i əl ilə bir telefondan digərinə köçürmədən cihazlar arasında keçid etməyə imkan verəcək.
“Apple” yeni imkanın mövcudluğunu iyunda keçirilən WWDC26 tədbirində “iOS 27”-yə əlavə ediləcək funksiyaların yer aldığı təqdimat slaydında qısa şəkildə göstərib. Şirkət həmin vaxt funksiyanın iş prinsipi barədə ətraflı məlumat verməyib. “Apple” “iOS 27”-nin 2026-cı ilin payızında istifadəyə veriləcəyini açıqlayıb.
Funksiyanın necə işləyəcəyinə dair yeni detallar isə “iOS 27” və “Xcode 27” sınaqlarından ortaya çıxıb. “MacRumors” yazır ki, istifadəçi parametrlərdən bir “iPhone”-u əsas, digərini isə əlavə cihaz kimi seçə biləcək.
Əsas eSIM istifadəçinin əsas “iPhone”-da qalacaq. İkinci telefona isə eyni nömrə ilə əlaqələndirilmiş ayrıca “companion eSIM” quraşdırılacaq. Bunun sayəsində telefon nömrəsini iki cihaz arasında dəyişmək mümkün olacaq.
Lakin burada mühüm fərq var: eyni nömrə hər iki “iPhone”-da eyni vaxtda aktiv işləməyəcək. Sistem nömrəni həmin anda istifadə olunan cihazlardan birinə yönəldəcək. Beləliklə, bu funksiya iki telefonun eyni anda eyni nömrəyə zəng qəbul etdiyi klassik MultiSIM xidmətindən fərqlənəcək.
Funksiyanın işləməsi mobil operatorun dəstəyindən də asılı olacaq. İkinci “iPhone” üçün əlavə eSIM profilini operatorun infrastrukturu təqdim etməli olduğundan, iOS 27-ni quraşdırmaq özü-özlüyündə funksiyanın aktivləşməsi üçün kifayət etməyəcək.
Hazırda ABŞ-nin “T-Mobile” və Almaniyanın “Deutsche Telekom” operatorlarının ilkin dəstək verə biləcəyi bildirilir. Bununla belə, bu operatorların funksiyanı iOS 27-nin ilk günündən istifadəyə verəcəyinə dair yekun rəsmi açıqlama yoxdur.
Mövcud sistemdə isə eSIM bir “iPhone”-dan digərinə köçürüldükdə əvvəlki cihazdakı xətt deaktiv olunur. “Apple Support” bunu eSIM “Quick Transfer” funksiyasının hazırkı iş prinsipi kimi göstərir. “iPhone Handoff” məhz bu məhdudiyyəti aradan qaldıraraq iki iPhone arasında keçidi daha rahat etməyi nəzərdə tutur.
“iOS 27”-nin sentyabr ayında geniş istifadəçi auditoriyası üçün buraxılması gözlənilir. Bununla belə, “iPhone Handoff”un hansı ölkələrdə və hansı operatorlarla ilk gündən aktiv olacağı hələ tam açıqlanmayıb.
