ABŞ-lı milyarder İlon Maskın rəhbərlik etdiyi “Neuralink” şirkəti 2026-cı ildə “beyin-kompüter interfeysi” implantlarının kütləvi istehsalına başlayacağını elan edib. Bu barədə Mask “X” platformasında məlumat verib.
Maskın açıqlamasına görə, “Neuralink” bu il tam avtomatlaşdırılmış və optimallaşdırılmış cərrahiyyə prosedurlarına keçəcək. Bu implantlar insanlara düşüncələri ilə cihazları idarə etməyə imkan verəcək.
Məlumata görə, implantlar onurğa beyni zədələnmələri və digər nevroloji problemləri olan xəstələr üçün nəzərdə tutulub. İlk xəstə artıq cihazdan istifadə edərək oyun oynamaq, internet səhifələrinə baxmaq, sosial mediada paylaşım etmək və noutbukda kursoru hərəkət etdirmək imkanına malik olub.
“Neuralink” 2024-cü ildən insanlarda klinik sınaqlara başlayıb. Mask həmçinin “Optimus” layihəsi çərçivəsində robotların ağır işləri yerinə yetirəcəyini və əmək bazarını dəyişdirəcəyini bildirib.
