Kollektiv Təhlükəsizlik Müqaviləsi Təşkilatının (KTMT) sabiq baş katibi Nikolay Bordyuja Ermənistanın təşkilatdan xaric edilməsini təklif edib. O bildirib ki, İrəvan KTMT-nin fəaliyyətində iştirak etmədiyi və üzvlük haqlarını ödəmədiyi halda, hüquqi baxımdan üzv statusunu saxlamaqda davam edir.
MSNews.az xəbər verir ki, Bordyuja bu barədə Rusiyanın “RİA Novosti” agentliyinə müsahibəsində danışıb. Onun açıqlamasını Ermənistanın “NEWS.am” nəşri də yayıb.
Bordyujanın sözlərinə görə, Ermənistanın KTMT-də iştirakını dondurması təşkilatın qərar qəbul etmə mexanizmində hüquqi ziddiyyət yaradır.
“Əgər onlar iştiraklarını dayandırır, lakin təşkilatdan çıxmırlarsa, KTMT-nin tamhüquqlu üzvləri olaraq qalırlar. Qərarlar isə konsensus əsasında qəbul edilir və onların mövqeyi nəzərə alınmalıdır”, – deyə sabiq baş katib bildirib.
O hesab edir ki, Ermənistanın mövcud mövqeyi təşkilatın fəaliyyəti ilə ziddiyyət təşkil edir.
Bordyuja Ermənistanın ya təşkilatın fəaliyyətində tam iştirak etməli, ya da üzvlükdən rəsmi şəkildə imtina etməli olduğunu vurğulayıb.
“Mən onları xaric edərdim. Üzvlük haqqı ödəmirlər, fəaliyyətlərdə iştirak etmirlər. Əgər ciddi tərəfdaşdırlarsa, sadəcə təşkilatdan çıxmalıdırlar”, – deyə o bildirib.
Sabiq baş katib Ermənistan rəhbərliyinin mövqeyini ziddiyyətli adlandırıb.
Onun fikrincə, İrəvanın təşkilatdan çıxmadan fəaliyyətini dayandırması KTMT daxilində qərarların qəbuluna maneələr yaradır.
KTMT-nin hazırkı baş katibi Taalatbek Masadıkov daha əvvəl Ermənistanın üzvlüyü məsələsinin 11 noyabr 2026-cı ildə Moskvada keçiriləcək Kollektiv Təhlükəsizlik Şurasının iclasında gündəmə gətirilə biləcəyini açıqlayıb.
Onun sözlərinə görə, təşkilatın Nizamnaməsinin 25-ci maddəsi üzvlük haqlarının ödənilməməsi və ayrılmış vəzifələrin doldurulmaması hallarında səsvermə hüququnun itirilməsini nəzərdə tutur.
Bununla belə, Ermənistanın təşkilatdan çıxarılması barədə hələ heç bir yekun qərar qəbul edilməyib.
Ermənistan 2024-cü ilin fevralında KTMT-də iştirakını dondurduğunu elan edib.
Baş nazir Nikol Paşinyan bu qərarı təşkilatın Ermənistanın təhlükəsizlik gözləntilərini doğrultmaması ilə əsaslandırıb. İrəvan xüsusilə Azərbaycanla sərhəddə yaşanan gərginliklər zamanı KTMT-nin mövqeyindən narazılığını ifadə edib.
Bundan sonra Ermənistan təşkilatın hərbi təlimlərində və iclaslarında iştirakını dayandırıb, üzvlük haqlarını ödəməkdən imtina edib.
Bununla belə, ölkə hüquqi baxımdan KTMT-nin üzvü olaraq qalır.
Paşinyan daha əvvəl Ermənistanın təşkilatdan xaric edilməsindən məmnun qalacağını da bildirmişdi.
