Dövlət Təhlükəsizliyi Xidməti (DTX) Azərbaycan və xarici ölkə vətəndaşlarının iştirakı ilə terrorçuluğa hazırlıq və terrorçuluğun maliyyələşdirilməsi ilə bağlı araşdırma çərçivəsində 5 ölkədə paralel antiterror tədbirlərinin keçirildiyini, nəticədə qruplaşmanın 10 üzvünün saxlanıldığını açıqlayıb.
MSNews.az xəbər verir ki, DTX-nin məlumatına əsasən, əvvəllər “Sumqayıt camaatı” adlı terror qruplaşmasının tərkibində cinayət əməllərinə görə məhkum olunmuş Vüqar Abdullayevin Cəlal Hacıyev, Cavid Əliyev, Nicat Əhmədov, Nazim Əliyev, İlkin Həsənzadə və digər şəxslərlə Azərbaycanda ictimai və dini xadimlərə sui-qəsd hazırlamaq məqsədilə cinayət əlaqəsinə girdiyi müəyyən edilib.
İstintaqın versiyasına görə, qrup üzvləri hədəf seçdikləri şəxslərin hərəkət marşrutlarını və mühafizə vəziyyətlərini araşdırıb, planlaşdırılan hücumlardan sonra isə xaricdəki münaqişə bölgələrinə qaçmağı nəzərdə tutublar. Gizli görüşlərin və telefon danışıqlarının sənədləşdirildiyi bildirilir.
DTX həmçinin Cəlal Hacıyev və xaricdə yaşayan bir sıra Azərbaycan vətəndaşları vasitəsilə dini radikalizm zəminində silahlı münaqişələrdə iştirak edən şəxslərin, o cümlədən beynəlxalq terror təşkilatlarının kriptovalyuta sistemləri ilə maliyyələşdirildiyini bildirir. İstintaq sosial şəbəkələrdə dini ayinlərin icrası adı altında yayılan saxta elanlarla vəsait toplanıldığını da müəyyən etdiyini açıqlayıb.
Digər ölkələrin xüsusi xidmət orqanları ilə keçirilən birgə tədbirlər nəticəsində 5 ölkədə ümumilikdə 10 nəfərin saxlanıldığı, xaricdə tutulan Elşən Əsgərovun isə Azərbaycana ekstradisiya edildiyi bildirilir.
DTX-nin açıqlamasında eyni zamanda 11 nəfərin – Vüqar Abdullayev, Cəlal Hacıyev, Cavid Əliyev, Nicat Əhmədov, Nazim Əliyev, İlkin Həsənzadə, Ayxan Hüseynov, Elşən Əsgərov, Fəxrəddin İmanov, Nail Rəsulov və Elgün İsmayılovun – müxtəlif maddələrlə təqsirləndirilən şəxs qismində məsuliyyətə cəlb olunduğu və barələrində həbs qətimkan tədbiri seçildiyi qeyd olunur. Rəsmi məlumat 10 nəfərin “5 ölkədə paralel tədbirlər nəticəsində saxlanılması” ilə 11 nəfərin cinayət işi üzrə statusunu ayrıca göstərir.
Cinayət işi üzrə istintaq-əməliyyat tədbirləri davam edir. Adları açıqlanan şəxslər barəsində ittihamlar məhkəmənin yekun hökmü ilə təsdiqlənənədək onlar təqsirsiz sayılırlar.
