Dünya futbolunun əfsanələrindən biri, mərhum niderlandlı futbolçu Yohan Kroyffun 17 yaşlı nəvəsi Şey Kroyff-Bin ilk dəfə ABŞ-ın 18 yaşadək futbolçulardan ibarət milli komandasına çağırılıb.
MSNews.az xəbər verir ki, gənc yarımmüdafiəçi baş məşqçi Ben Krossun müəyyənləşdirdiyi 20 nəfərlik heyətə daxil edilib.
Hazırda İspaniyanın “Ximnastik de Tarraqona” klubunun gənclər komandasında çıxış edən Kroyff-Bin futbol karyerasını Kataloniyada davam etdirir.
17 yaşlı futbolçunun anası Yohan Kroyffun qızı Şantal Kroyff, atası isə amerikalı futbol məşqçisi və “TOVO Academy”-nin təsisçisi Todd Bindir.
Kroyff-Bin ABŞ, Niderland və İspaniya milli komandalarında oynamaq hüququna malikdir. Lakin gənc futbolçu ilk beynəlxalq dəvətini atasının vətəni olan ABŞ-dan alıb.
ABŞ-ın U-18 yığması noyabrın 9–18-də Portuqaliyada təlim-məşq toplanışında iştirak edir. Komandanın 15 noyabrda Norveç, 17 noyabrda isə Portuqaliya ilə yoldaşlıq görüşləri keçirməsi planlaşdırılır.
Qeyd edək ki, Yohan Kroyff futbol tarixinin ən nüfuzlu simalarından biridir. “Ayaks” və “Barselona”nın əfsanəsi 1971, 1973 və 1974-cü illərdə üç dəfə “Qızıl top” mükafatına layiq görülüb.
Şey Kroyff-Binin ABŞ-ın gənclər millisinə çağırılması onun gələcəkdə əsas milli komanda səviyyəsində də mütləq ABŞ-ı təmsil edəcəyi demək deyil.
