ABŞ Prezidenti Donald Trampın İraqın Baş naziri Əli Zeydini noyabrın 7-dən 11-dək İrana qarşı genişmiqyaslı hərbi əməliyyat keçirilə biləcəyi barədə xəbərdar etdiyi iddia olunur. Məlumat hələlik rəsmi təsdiqini tapmayıb.
MSNews.az xəbər verir ki, İraqın “Əl-Məluma” agentliyi Süleymaniyyə vilayətindəki adı açıqlanmayan yüksək vəzifəli mənbəyə istinadən məlumat yayıb.
İddiaya əsasən, Tramp İraqın Baş nazirinə mümkün hücum zamanı bölgədəki silahlı qruplaşmaların reaksiyası barədə xəbərdarlıq edib. Həmçinin ABŞ və İsrail hərbi təyyarələrinin İraqın hava məkanından istifadə edə biləcəyi bildirilib.
Mənbə Bağdadın noyabrın 7–11-də hava məkanını bağlamaq qərarı verdiyini də iddia edib. Lakin İraq hökuməti bu məlumatı təkzib edib. Rəsmi açıqlamada ölkənin hava məkanının açıq olduğu, yalnız hava hücumundan müdafiə qüvvələrinin təlimləri üçün məhdud ərazi ayrıldığı bildirilib.
Tramp və Zeydi arasında telefon danışığının baş tutduğu isə təsdiqlənib. İraq hökumətinin məlumatına görə, tərəflər regional təhlükəsizlik məsələlərini müzakirə ediblər. Zeydi İraq ərazisinin qonşu dövlətlərə hücum üçün istifadə olunmasına icazə verilməyəcəyini vurğulayıb. “Al Jazeera” qeyd edir ki, rəsmi açıqlamada konkret hücum tarixi göstərilməyib.
Bu arada, Rusiya Xarici İşlər Nazirliyi vətəndaşlarına İrana səfərlərdən müvəqqəti çəkinməyi tövsiyə edib. Nazirliyin sözçüsü Mariya Zaxarova bölgədə yenidən hərbi eskalasiya riskinin qaldığını bildirib. “İnterfaks” agentliyinin məlumatına görə, bu, əvvəlki təhlükəsizlik tövsiyələrinin qüvvədə saxlanılmasıdır və 7–11 noyabr tarixləri ilə bağlı ayrıca xəbərdarlıq deyil.
Beləliklə, ABŞ-nin İrana həmin tarixlərdə genişmiqyaslı hücum planlaşdırdığına dair iddialar müstəqil mənbələr tərəfindən təsdiqlənməyib. Bununla belə, Vaşinqton və Tehran arasında davam edən gərginlik yeni hərbi qarşıdurma ehtimalını gündəmdə saxlayır.
