Azərbaycan Prezidenti İlham Əliyev və Türkiyə Prezidenti Rəcəb Tayyib Ərdoğan noyabrın 8-də Xankəndi şəhərində Vətən Müharibəsi Qəhrəmanları, həmçinin “Qarabağ” və “Zəfər” ordenlərinə layiq görülmüş hərbi qulluqçularla görüşüblər.
MSNews.az xəbər verir ki, görüşdə birinci xanım Mehriban Əliyeva, Prezident İlham Əliyevin qızı Leyla Əliyeva və Türkiyə Prezidentinin xanımı Əminə Ərdoğan da iştirak ediblər.
8 Noyabr – Zəfər Gününün altıncı ildönümündə keçirilən görüşdə Vətən müharibəsində göstərdikləri xidmətlərə görə yüksək dövlət təltiflərinə layiq görülmüş hərbçilər iştirak ediblər.
Görüş zamanı Azərbaycan və Türkiyə prezidentləri, birinci xanımlar, Leyla Əliyeva və hərbi qulluqçular birgə xatirə fotosu çəkdiriblər.
Qeyd edək ki, “Vətən Müharibəsi Qəhrəmanı” fəxri adı, “Qarabağ” və “Zəfər” ordenləri 2020-ci il Vətən müharibəsindən sonra təsis edilən dövlət təltifləri sırasındadır. Bu təltiflər Azərbaycan hərbçilərinin xidmətlərinin qiymətləndirilməsi məqsədi daşıyır.
Türkiyə Prezidenti Rəcəb Tayyib Ərdoğanın Azərbaycana rəsmi səfəri çərçivəsində Şuşada ikitərəfli görüş və mətbuata bəyanatlar da keçirilib.
