ABŞ-ın İmmiqrasiya və Gömrük Mühafizəsi Xidmətinin (ICE) direktoru vəzifəsini icra edən Todd Layons istefa ərizəsini təqdim edib.
“Reuters” və “Associated Press”-in məlumatına görə, Layons mayın 31-də vəzifəsindən ayrılacaq və bundan sonra özəl sektora keçəcək. (Reuters, AP News)
“Fox News” da öz mənbələrinə istinadən yazıb ki, Layons istefa məktubunu Daxili Təhlükəsizlik naziri Markveyn Mallinə təqdim edib və keçid dövrünə yardım etmək üçün mayın 31-dək vəzifəsinin icrasını davam etdirəcək. (Fox News)
Layons 2025-ci ilin martından ICE-yə rəhbərlik edirdi. Onun rəhbərliyi dövründə Tramp administrasiyasının sərt immiqrasiya siyasəti daha da genişlənib, ICE əməliyyatları artırılıb və qurum bir sıra mübahisəli reydlərə görə tənqid hədəfinə çevrilib. Onun gedişi həm ICE ətrafında artan siyasi gərginlik, həm də Daxili Təhlükəsizlik Nazirliyində baş verən digər rəhbərlik dəyişiklikləri fonunda baş verir.
ABŞ Daxili Təhlükəsizlik Nazirliyi Layonsu “güclü lider” kimi xarakterizə edib. Nazirlik onun yerinə yeni rəhbər seçilənədək keçid prosesinin idarə olunacağını bildirib. Hazırda rəsmi xələfin kim olacağı ilə bağlı yekun açıqlama verilməyib.
