Əlcəzair parlamenti ölkənin hərbi qüvvələrinin qonşu Nigerə göndərilməsinə icazə verib. Qərar həyata keçirilərsə, bu, Əlcəzair ordusunun 1973-cü ildən bəri ilk xarici hərbi yerləşdirməsi olacaq. Hərbi kontingentin Nigerin strateji enerji obyektlərinin təhlükəsizliyinin təmin edilməsində iştirak edəcəyi gözlənilir.
MSNews.az xəbər verir ki, qərar oktyabrın 25-də parlamentin hər iki palatasında keçirilən qapalı iclaslarda qəbul edilib. Əlcəzair Prezidenti Abdelməcid Tebbunun təqdim etdiyi təşəbbüs parlamentin yuxarı palatasında yekdilliklə, aşağı palatasında isə mütləq səs çoxluğu ilə dəstəklənib.
Əlcəzairin dövlət xəbər agentliyi “APS” bildirir ki, yuxarı palatada səsvermədə iştirak edən 148 üzvün hamısı təşəbbüsün lehinə səs verib.
Hərbi qüvvələrin Nigerin şimalındakı Madama aviabazasında yerləşdirilməsi nəzərdə tutulur.
“Reuters” agentliyinin məlumatına görə, Liviya sərhədi yaxınlığında yerləşən bu baza əvvəllər Fransanın Sahel bölgəsində keçirdiyi “Barkhane” əməliyyatı çərçivəsində istifadə olunub.
Hazırda Əlcəzair hərbçilərinin yeni kontingentinin bölgəyə göndərildiyi rəsmən təsdiqlənməyib. Nigerin təhlükəsizlik qurumundakı mənbə bildirib ki, hərbi yerləşdirmə hələ həyata keçirilməyib.
Qərarın əsas məqsədlərindən biri enerji infrastrukturunun qorunmasıdır.
Əlcəzairin Niger ərazisində neft və qaz layihələrində iqtisadi maraqları mövcuddur. Xüsusilə, iki ölkənin əməkdaşlıq etdiyi Transsəhra qaz kəməri layihəsi və neft kəşfiyyatı işləri təhlükəsizlik məsələsini ön plana çıxarır.
“Associated Press” agentliyinin məlumatına görə, Əlcəzair rəsmiləri hərbi missiyanın əsasən enerji obyektlərinin mühafizəsinə yönələcəyini, birbaşa döyüş əməliyyatlarında iştirak məqsədi daşımadığını bildirirlər.
Əlcəzairin bu addımı Nigerlə münasibətlərin sürətlə yaxınlaşdığı dövrə təsadüf edir.
Avqustun 28–29-da Nigerin paytaxtı Niameydə hərbi qiyam baş vermiş və hadisələr dövlət çevrilişi cəhdinə çevrilmişdi. Əlcəzair həmin vaxt Niger hakimiyyətinə dəstək məqsədilə hərbi təyyarələr göndərmişdi.
Oktyabr ayında isə Nigerin müdafiə naziri Salifu Modi Əlcəzairə səfər edərək iki ölkə arasında hərbi əməkdaşlıq protokolunun imzalanmasında iştirak edib.
Bölgədəki təhlükəsizlik vəziyyətində Liviya amili də mühüm yer tutur. Madama bazasının Liviya sərhədinə yaxın yerləşməsi onun strateji əhəmiyyətini artırır.
Fransanın “Le Monde” nəşri qeyd edir ki, Əlcəzair qüvvələrinin burada yerləşdirilməsi Liviya ilə Niger arasındakı sərhədkeçmə marşrutlarına nəzarətin gücləndirilməsi ilə də bağlı ola bilər. Bununla belə, həmin məqsəd hələ rəsmi şəkildə təsdiqlənməyib.
Yeni qərarın icrası, göndəriləcək şəxsi heyətin sayı və hərbi missiyanın dəqiq müddəti barədə əlavə məlumat açıqlanmayıb.
