Böyük Britaniyanın ən qədim və iri maliyyə qurumlarından biri olan “Barclays” bankı mənfəətinin artmasına baxmayaraq, təxminən 5000 iş yerini ixtisar etməyi planlaşdırır. Qərar bankın süni intellekt və avtomatlaşdırma texnologiyalarından daha geniş istifadə etməsi, eləcə də əməliyyat xərclərini azaltmaq strategiyası ilə əlaqələndirilir.
MSNews.az xəbər verir ki, bu barədə “Reuters” və “AFP” agentlikləri məlumat yayıb.
Bankın oktyabrın 22-də açıqladığı plana əsasən, 2026-cı ilin sonunadək ümumilikdə 5000 vəzifə ixtisar ediləcək. Bu, “Barclays”-in dünya üzrə təxminən 93 min nəfərlik işçi heyətinin 5 faizindən bir qədər çoxuna bərabərdir.
İxtisarların 1000-i artıq həyata keçirilib. Qalan 4000 iş yerinin isə ilin sonuna qədər azaldılması nəzərdə tutulur.
Bankın maliyyə direktoru Anna Kross bildirib ki, ixtisarların təxminən 60 faizi texniki və inzibati dəstək funksiyalarına, o cümlədən proqram təminatı hazırlayan mütəxəssislərə təsir göstərəcək.
Süni intellektin tətbiqi müəyyən tapşırıqların daha az işçi ilə yerinə yetirilməsinə imkan verir.
“Barclays”-in baş icraçı direktoru C. S. Venkatakrişnan isə bildirib ki, işçi sayının azalması yalnız süni intellektlə bağlı deyil. Bank uzun müddətdir texnoloji infrastrukturu yeniləyir, daxili prosesləri sadələşdirir və avtomatlaşdırmanı genişləndirir.
Onun sözlərinə görə, süni intellekt bu prosesdə mühüm rol oynayır və gələcəkdə əhəmiyyəti daha da arta bilər.
Maliyyə nəticələrinə əsasən, “Barclays”-in üçüncü rübdə vergidən əvvəlki mənfəəti 2,3 milyard funt-sterlinqə çatıb. Bu, ötən ilin müvafiq dövrü ilə müqayisədə 12 faiz artım deməkdir.
Bununla belə, bankın bəzi investisiya istiqamətlərində nəticələri analitiklərin gözləntilərindən zəif olub.
“Barclays” rəhbərliyi xərclərin azaldılması və texnoloji modernləşmə hesabına 2027-ci ildə 1,1 milyard funt-sterlinqdən çox qənaətə nail olmağı hədəfləyir.
