Prezident İlham Əliyev sentyabrın 14-də Bakıda Elm və Təhsil Nazirliyinin Yüksək Texnologiyalar Parkında yaradılan “SABAH.city” innovasiya şəhərciyinin birinci mərhələsinin açılışında iştirak edib. Layihənin ilk mərhələsində universitetləri, startapları, texnologiya şirkətlərini və tədqiqat mərkəzlərini bir məkanda birləşdirən innovasiya infrastrukturu yaradılıb.
MSNews.az xəbər verir ki, bu barədə Azərbaycan Prezidentinin rəsmi internet səhifəsi məlumat yayıb. Elm və təhsil naziri Emin Əmrullayev dövlət başçısına layihə barədə məlumat verib.
“SABAH.city” layihəsinin ümumilikdə 20 hektar ərazidə həyata keçirilməsi nəzərdə tutulur. Birinci mərhələ 5 hektardan çox ərazini, 20 min kvadratmetr tikili sahəsini və bir-biri ilə əlaqəli dörd korpusu əhatə edir. Tikinti işlərinə 2025-ci ilin oktyabrında başlanılıb.
Şəhərcikdə beş restoran, market və tədbirlər zalı ilə yanaşı basketbol və futbol meydançaları, iki padel kortu, açıq istirahət zonaları, piyada və velosiped zolaqları, eləcə də parklanma sahələri yaradılıb.
Layihənin əsas istiqamətlərindən biri ali təhsillə praktiki texnoloji fəaliyyəti birləşdirməkdir. Bakı Dövlət Universiteti, Azərbaycan Texniki Universiteti və Azərbaycan Dövlət Neft və Sənaye Universitetinin mühəndislik, informasiya texnologiyaları və tətbiqi elmlər üzrə təhsil alan 1500-dən çox tələbəsinin burada tədris və praktiki fəaliyyətə cəlb edilməsi planlaşdırılır. Şəhərcik tam fəaliyyətə başladıqdan sonra gündəlik ziyarətçi sayının təxminən 3 min nəfərə çatacağı gözlənilir.
Kompleksdə həmin üç universitet tərəfindən ümumilikdə 13 tədris və tədqiqat laboratoriyası yaradılıb. Burada süni intellekt, robototexnika, kompüter elmləri, kibertəhlükəsizlik, biotexnologiya, nanobiologiya, nanofizika, kimya, telekommunikasiya və digər prioritet istiqamətlərdə tədqiqat və tətbiqi işlərin aparılması nəzərdə tutulur.
“SABAH.city”də ASAN Süni İntellekt Mərkəzi — ASAN AI Hub da fəaliyyət göstərəcək. Dövlət Agentliyinin sədri Ülvi Mehdiyev Prezident İlham Əliyevə mərkəz, “INNOLAND” İnkubasiya və Akselerasiya Mərkəzi və “ASAN xidmət”in “Süni İntellekt Assistent” layihəsi barədə məlumat verib.
ASAN AI Hub tədqiqatçıları, dövlət qurumlarını, özəl sektoru və fərdi istifadəçiləri vahid platformada birləşdirmək, açıq innovasiyanı və dövlət-biznes-universitet əməkdaşlığını gücləndirmək məqsədilə yaradılıb. Rəsmi məlumata görə, indiyədək mərkəz çərçivəsində 50 süni intellekt həlli təqdim olunub. Mərkəz Azərbaycanın 8 universiteti və Milli Elmlər Akademiyası ilə yanaşı, Çinin Sinxua, Böyük Britaniyanın Oksford və Türkiyənin Boğaziçi universitetləri daxil olmaqla xarici tərəfdaşlarla əməkdaşlıq əlaqələri qurub.
“INNOLAND” İnkubasiya və Akselerasiya Mərkəzindən isə indiyədək 150 startap yararlanıb, onlardan 4-ü xarici investorlar tərəfindən satın alınıb. “Süni İntellekt Assistent” platforması istifadəçilərə “ASAN xidmət”in müxtəlif fəaliyyət istiqamətləri barədə məlumatı söhbət formatında əldə etmək, həmçinin təhlil və proqnozlaşdırma imkanlarından yararlanmaq üçün hazırlanıb.
Şəhərcikdə 12 startap üçün kovorkinq zonası və yerli-beynəlxalq texnologiya şirkətləri, korporativ tədqiqat və inkişaf mərkəzləri üçün 22 ofis sahəsi də yaradılıb. Birinci mərhələyə üç ali məktəb, səkkiz texnologiya və innovasiya şirkəti və 12 startap olmaqla ümumilikdə 23 əsas ekosistem iştirakçısı cəlb edilib.
Layihənin məqsədi elm, təhsil, innovasiya və yüksək texnologiyalar sahəsində fəaliyyət göstərən əsas iştirakçıları vahid məkanda birləşdirmək, elmi biliklərin və texnologiyaların iqtisadi və sosial dəyərə çevrilməsini sürətləndirməkdir. Rəsmi açıqlamada “SABAH.city”nin uzunmüddətli perspektivdə insan kapitalının, tətbiqi elmin və texnologiya transferinin inkişafına töhfə verməsinin nəzərdə tutulduğu bildirilir.
