Türkiyənin Milliyyətçi Hərəkat Partiyasının (MHP) sədri Dövlət Bağçalı türk dövlətləri arasındakı münasibətlərin xarici siyasi layihələr və geosiyasi hesablamalarla zəiflədilə bilməyəcəyini bəyan edib. MHP lideri Azərbaycanla Türkiyə arasındakı tarixi və strateji əlaqələrin gündəlik siyasi proseslərdən və müvəqqəti fikir ayrılıqlarından daha güclü olduğunu vurğulayaraq, iki ölkə arasında qarşılıqlı etimadın qorunmasını Türk dünyasının gələcəyi baxımından əvəzolunmaz adlandırıb.
MSNews.az xəbər verir ki, bu barədə Dövlət Bağçalı oktyabrın 23-də MHP-nin Mərkəzi İdarə Heyəti, Mərkəzi İntizam Heyəti və millət vəkillərinin birgə toplantısından sonra yaydığı yazılı bəyanatda bildirib.
Partiyanın rəsmi saytında dərc olunan bəyanatda Türkiyənin Türk dünyasından kənarda saxlanılmasını nəzərdə tutan yanaşmaların diqqətlə izlənildiyi qeyd edilib.
“Türk dünyasında ayrılıq yaratmaq istəyənlər məqsədlərinə çata bilməyəcəklər”
Bağçalı bildirib ki, türk dövlətləri arasındakı əlaqələr yalnız siyasi maraqlara deyil, çoxəsrlik tarixi və mədəni bağlara əsaslanır. Onun sözlərinə görə, Türk dünyasının gələcəyi müstəqil dövlətlərin suverenliyi, qarşılıqlı hörmət, bərabərhüquqlu tərəfdaşlıq, etimad və qardaşlıq prinsipləri üzərində qurulmalıdır. MHP lideri vurğulayıb ki, xarici qüvvələrin Türk dünyasının birliyini zəiflətmək cəhdləri nəticə verməyəcək.
“Bu birlikdən narahat olanların gözləntiləri qardaş dövlətlərimizin ortaq iradəsi qarşısında heç vaxt reallaşmayacaq”, – deyə Bağçalı bəyan edib.
O, türk dövlətlərinin gücünün qarşılıqlı etimad və həmrəylikdən qaynaqlandığını qeyd edib.
Dövlət Bağçalı Türkiyə Prezidenti Rəcəb Tayyib Ərdoğanın Azərbaycan Prezidenti İlham Əliyevi Ankarada keçiriləcək Türk Dövlətləri Təşkilatının Zirvə Görüşünə şəxsən dəvət etməsinə də toxunub. MHP sədrinin sözlərinə görə, bu dəvət Azərbaycan-Türkiyə münasibətlərinin tarixi və strateji dəyərinin qorunması baxımından xüsusi əhəmiyyət daşıyır.
Bağçalı iki ölkə arasındakı əlaqələrin siyasi proseslərdən asılı olmayan möhkəm təməllərə söykəndiyini vurğulayıb.
“Türkiyə ilə Azərbaycan arasındakı bağlar gündəlik siyasi hadisələrin və müvəqqəti fikir ayrılıqlarının fövqündə dayanaraq ortaq tarix, dil, mədəniyyət, qarşılıqlı etimad və könül birliyi üzərində yüksəlir”, – deyə o bildirib.
MHP lideri dövlətlər arasında müxtəlif məsələlərə fərqli yanaşmaların ortaya çıxmasını təbii hal kimi qiymətləndirib.
O bildirib ki, əsas məsələ belə fikir ayrılıqlarının qarşılıqlı etimadı zədələmədən aradan qaldırılmasıdır.
“Əsas məsələ bu məsələləri qardaşlıq hüququna xələl gətirmədən, qarşılıqlı anlaşma və birbaşa dialoq yolu ilə həll etmək iradəsini ortaya qoymaqdır”, – deyə Bağçalı vurğulayıb.
Onun fikrincə, Azərbaycan və Türkiyə arasında qarşılıqlı etimadın qorunması yalnız ikitərəfli münasibətlər üçün deyil, bütün Türk dünyasının ortaq gələcəyi baxımından mühüm əhəmiyyət daşıyır.
MHP sədri dövlətlər arasındakı həmrəyliyin mövcud problemlərin həllində əsas prinsip olaraq qalmalı olduğunu bildirib.
Bağçalı bəyanatında oktyabrın 29–30-da Ankarada keçirilməsi nəzərdə tutulan Türk Dövlətləri Təşkilatının XIII Zirvə Görüşünün əhəmiyyətini də xüsusi vurğulayıb.
MHP liderinin fikrincə, toplantı türk dövlətlərinin ortaq gələcək iradəsinin nümayişi baxımından mühüm hadisə olacaq.
Zirvə Görüşü çərçivəsində Türk Dövlətləri Təşkilatına dövr sədrliyinin Azərbaycandan Türkiyəyə keçməsi nəzərdə tutulur.
Bağçalı daha əvvəl də Türkiyənin təşkilata sədrliyi dövründə siyasi, iqtisadi, nəqliyyat, enerji, müdafiə sənayesi və texnologiya sahələrində əməkdaşlığın genişləndirilməsinin vacibliyini vurğulamışdı.
MHP liderinin son bəyanatı Azərbaycan-Türkiyə münasibətlərində birbaşa siyasi dialoqun və qarşılıqlı etimadın qorunmasına çağırış kimi diqqət çəkir. Bağçalı iki ölkə arasındakı əlaqələrin xarici təsirlərdən və müvəqqəti fikir ayrılıqlarından asılı olmayaraq davam etdirilməsinin vacibliyini ön plana çıxarıb.
