Ağdərə rayonunun işğaldan azad edilmiş Çardaqlı kəndində humanitar minatəmizləmə əməliyyatı zamanı mina partlayıb, iki nəfər yaralanıb.
MSNews.az xəbər verir ki, bu barədə Azərbaycan Respublikasının Minatəmizləmə Agentliyi məlumat yayıb.
Bildirilib ki, avqustun 3-də qeyri-hökumət təşkilatının əməkdaşları tərəfindən ərazidə humanitar minatəmizləmə əməliyyatı aparılarkən piyada əleyhinə mina partlayıb.
Hadisə nəticəsində 1994-cü il təvəllüdlü Əlzəmin Surxaylı sağ ayağından xəsarət alıb. Partlayış zamanı onunla birlikdə çalışan 1998-ci il təvəllüdlü Füzuli Mirzəyev də yaralanıb.
Hər iki şəxs ərazidən təxliyə edilərək rayon mərkəzi xəstəxanasına yerləşdirilib. ANAMA-nın məlumatına əsasən, yaralıların vəziyyəti qənaətbəxşdir.
Hadisənin baş verdiyi ərazi işğaldan azad edilmiş torpaqlarda həyata keçirilən humanitar minatəmizləmə əməliyyatlarının bir hissəsi olub. ANAMA əvvəlki mina hadisələri ilə bağlı açıqlamalarında vətəndaşları təhlükəsizlik qaydalarına əməl etməyə, mina təhlükəsi nişanlarına diqqətlə yanaşmağa və yoxlanılmamış ərazilərə daxil olmamağa çağırıb.
