Süni intellektin astronomiya sahəsində istifadəsinə dair maraqlı təcrübə həyata keçirilib. Texnologiya həvəskarı “Claude” süni intellektinə robotlaşdırılmış teleskopları idarə etmək imkanı verərək kosmik obyektlərin seçilməsi və fotoşəkillərinin çəkilməsi prosesini avtomatlaşdırıb.
MSNews.az xəbər verir ki, “SirMeeseekz” istifadəçi adı ilə tanınan şəxs “StellarDock” platforması vasitəsilə Çili, İspaniya və ABŞ-nin Yuta ştatında yerləşən teleskoplara çıxış əldə edib. Təcrübə barədə “Shazoo” nəşri də məlumat yayıb.
Süni intellekt müşahidə ediləcək səma cismini seçir, Ayın mövqeyini yoxlayır, uyğun teleskopu, filtrləri və ekspozisiya müddətini müəyyənləşdirir. Daha sonra teleskopu sifariş edir və çəkilmiş görüntüləri xüsusi proqramlarla emal edir.
Təcrübə nəticəsində İlbiz dumanlığı, Orion kəməri, Böyük Magellan Buludundakı Tarantul dumanlığı və Orion dumanlığının görüntüləri əldə edilib.
Layihənin ilkin mərhələsində süni intellekt elmi müşahidələr üçün istifadə olunub. İstifadəçinin bildirdiyinə görə, sistem üç gecə ərzində 8 asteroidin 57 mövqe ölçməsini apararaq nəticələri Kiçik Planetlər Mərkəzinə göndərib.
Daha sonra istifadəçi sistemdən sadəcə kosmosda gözəl obyektlər tapmasını istəyib.
Qeyd edək ki, görüntülər süni intellekt tərəfindən sıfırdan yaradılmayıb. Onlar real teleskop müşahidələri əsasında əldə edilib və proqram vasitəsilə işlənib. Təcrübənin nəticələri istifadəçinin paylaşdığı məlumatlara əsaslanır.
