Yaponiyada doğum səviyyəsinin azalması və əhalinin yaşlanması təhsil sisteminə ciddi təsir göstərməyə başlayıb. Ölkənin 17 prefekturasında 2040-cı ilədək ən azı 145 dövlət liseyinin bağlanacağı və ya digər təhsil müəssisələri ilə birləşdiriləcəyi gözlənilir.
MSNews.az xəbər verir ki, bu barədə Yaponiyanın “Asahi Shimbun” nəşrinin ölkənin 47 prefekturasının təhsil idarələri arasında apardığı sorğunun nəticələrində bildirilir. Araşdırma 2026-cı ilin may–iyun aylarında həyata keçirilib.
Məlumata görə, hazırda Yaponiyada prefekturaların tabeliyində fəaliyyət göstərən 3196 dövlət liseyi var. Mövcud planlar və proqnozlar əsasında onların ən azı 145-nin 2040-cı ilədək fəaliyyətini dayandıracağı gözlənilir.
Məktəblərin sayının azaldılması mərhələli şəkildə həyata keçiriləcək. Belə ki, 13 prefekturada 2030-cu ilədək 41 məktəbin bağlanması və ya birləşdirilməsi nəzərdə tutulur. Bu prefekturalardan dördündə 2040-cı ilədək əlavə 37, digər dörd prefekturada isə 67 məktəbin bağlanacağı proqnozlaşdırılır.
Ən böyük azalmanın Şizuoka, Niiqata və Naqano prefekturalarında baş verəcəyi gözlənilir.
Şizuokada mövcud 88 dövlət liseyindən 28–38-nin, Niiqatada 86 məktəbdən 22-nin, Naqanoda isə 81 məktəbdən 17-nin fəaliyyətini dayandıra biləcəyi bildirilir.
Paytaxt Tokioya yaxın Saytama prefekturasında da 15–19 məktəbin bağlanması ehtimal olunur.
Bu vəziyyət bəzi məktəblərin az sayda şagirdlə fəaliyyət göstərməsinə səbəb olur. Yerli idarəetmə orqanları təhsil keyfiyyətini qorumaq və mövcud resurslardan daha səmərəli istifadə etmək üçün məktəblərin birləşdirilməsi variantlarını nəzərdən keçirirlər.
Bununla yanaşı, məktəblərin bağlanması ucqar bölgələrdə yaşayan ailələr üçün əlavə çətinliklər yarada bilər. Şagirdlərin daha uzaqda yerləşən təhsil müəssisələrinə getməsi zərurəti yarana, bəzi yaşayış məntəqələrində isə məktəblərə çıxış imkanları zəifləyə bilər.
Mütəxəssislər hesab edirlər ki, əhalinin azalması davam edərsə, bağlanan məktəblərin sayı hazırkı proqnozları üstələyə bilər. Hazırda digər 30 prefekturada konkret say göstərilməyib və ya yenidən təşkilatlanma planları müzakirə mərhələsindədir.
