Səudiyyə Ərəbistanında Hellouin münasibətilə keçirilən kostyumlu əyləncələr sosial şəbəkələrdə geniş müzakirələrə səbəb olub. Bir vaxtlar bu cür tədbirlərin məhdudlaşdırıldığı ölkədə bayram şənliklərinin təşkil edilməsi vəliəhd şahzadə Məhəmməd bin Salmanın dövründə baş verən sosial dəyişiklikləri yenidən gündəmə gətirib.
MSNews.az xəbər verir ki, paytaxt Ər-Riyadda oktyabrın son günlərində restoranlar, hotellər və əyləncə mərkəzlərində Hellouin mövzusunda xüsusi proqramlar təşkil olunub.
Bu barədə “Haberler” məlumat yayıb.
Tədbirlər zamanı iştirakçılar qorxu filmlərinin personajlarını xatırladan kostyumlar geyinib, xüsusi makiyaj və dekorasiyalarla hazırlanmış əyləncələrə qatılıblar.
“What’s On Saudi Arabia” nəşrinin məlumatına görə, Ər-Riyaddakı “Gravity” əyləncə mərkəzində qorxu otaqları, canlı şoular və kostyum müsabiqələri təşkil edilib. Bir sıra hotellər və restoranlar da Hellouin mövzulu proqramlar təqdim ediblər.
Bayram tədbirləri internet istifadəçiləri arasında fərqli reaksiyalar doğurub. Bəziləri bu cür əyləncələri ölkədə ictimai həyatın liberallaşmasının göstəricisi kimi qiymətləndirib, digərləri isə onların Səudiyyə Ərəbistanının dini və mədəni ənənələrinə uyğun olmadığını bildirib.
Qeyd edək ki, 2018-ci ildə Ər-Riyadda keçirilən Hellouin şənliyinə polis müdaxilə etmişdi. Lakin sonrakı illərdə ölkədə sosial məhdudiyyətlərin yumşaldılması ilə belə tədbirlərin keçirilməsinə münasibət dəyişib. Bu barədə “The Independent” məlumat yayıb.
Məhəmməd bin Salmanın Vision 2030 proqramı çərçivəsində həyata keçirilən islahatlar ölkədə turizm, əyləncə və mədəniyyət sektorlarının inkişafına yönəlib. Bununla belə, sosial həyatdakı yumşalmalar siyasi və dini azadlıqlara tətbiq edilən bütün məhdudiyyətlərin aradan qaldırıldığı anlamına gəlmir.
