İspaniyada iki yüksəksürətli sərnişin qatarının toqquşması nəticəsində azı 68 nəfər həyatını itirib, onlarla insan yaralanıb. Oktyabrın 28-də Toledo əyalətində baş verən ağır qəzadan sonra xilasetmə əməliyyatları davam edir. Rəsmilər dağıntılar altından yeni cəsədlərin tapılması ehtimalını istisna etmirlər.
MSNews.az xəbər verir ki, hadisə yerli vaxtla saat 08:54-də Madrid–Sevilya yüksəksürətli dəmir yolu xəttinin 118-ci kilometrində, Los-Yebenes və Urda yaşayış məntəqələri yaxınlığında qeydə alınıb.
İspaniyanın dövlət televiziyası “RTVE” və “Telemadrid” tərəfindən yayılan yenilənmiş məlumata görə, qəzada ölənlərin sayı 68 nəfərə yüksəlib. Əvvəlki məlumatlarda 64 nəfərin öldüyü bildirilirdi.
İlkin araşdırmalara əsasən, “Renfe” şirkətinə məxsus “AVE 2080” qatarı relslərdə dayanmış “Iryo 6076” qatarına arxadan çırpılıb.
AVE qatarı səhər saat 08:00-da Madridin “Puerta de Atocha” stansiyasından yola düşmüş və saat 10:39-da Sevilyaya çatmalı idi.
Qəza zamanı hər iki qatarda ümumilikdə təxminən 544 sərnişin olub. Renfe qatarında 397, Iryo qatarında isə 147 sərnişinin olduğu bildirilir.
Güclü toqquşma nəticəsində bir neçə vaqon relsdən çıxıb, onların bir hissəsi dəmir yolu bəndindən aşağı yuvarlanıb.
Kastiliya-La-Mança regional hökumətinin açıqladığı yenilənmiş məlumatlara əsasən, 53 yaralı xəstəxanaya yerləşdirilib, onlardan 15-nin vəziyyəti ağırdır.
Hadisə yerinə yanğınsöndürənlər, polis, təcili tibbi yardım və digər xilasetmə qüvvələri cəlb olunub.
Regional hökumətin rəhbəri Emiliano Qarsiya-Paxe bildirib ki, dağılan vaqonların içərisində axtarışlar davam edir. Ölənlərin yekun sayının müəyyənləşdirilməsi üçün əlavə araşdırmalara ehtiyac var.
İlkin ehtimallardan biri dəmir yolu hərəkətinin idarə edilməsində insan səhvinə yol verilməsidir.
Məlumatlara görə, Iryo qatarı relslərdə dayandığı halda, AVE qatarının hərəkətini davam etdirməsinə icazə verilmiş ola bilər.
Lakin qəzanın insan səhvi və ya siqnalizasiya sistemində nasazlıq səbəbindən baş verdiyi hələ yekun istintaq nəticəsi ilə təsdiqlənməyib.
Qəzadan sonra Madrid, Syudad-Real və Andalusiya arasında yüksəksürətli dəmir yolu hərəkəti dayandırılıb.
Renfe şirkəti sərnişinlərə biletlərini əlavə ödəniş etmədən dəyişdirmək və ya qaytarmaq imkanı yaradıb.
Şirkət zərərçəkənlər və onların ailələri üçün 900 10 10 20 nömrəli yardım xəttini istifadəyə verib.
Bu, ölkədə 2026-cı ildə baş verən ikinci böyük dəmir yolu faciəsidir. Yanvarda Kordova əyalətinin Adamus yaşayış məntəqəsi yaxınlığındakı qəzada 46 nəfər həlak olmuşdu.
Toledodakı toqquşma isə 2013-cü ildə Santyaqo-de-Kompostela yaxınlığında 80 nəfərin ölümü ilə nəticələnmiş qəzadan sonra İspaniyanın ən ağır dəmir yolu faciələrindən birinə çevrilib.
