Məhkum edilmiş cinsi cinayətkar Ceffri Epşteynlə uzun illər əməkdaşlıq edən fransız model skautu Daniel Siad Paris yaxınlığındakı evində ölü tapılıb.
MSNews.az xəbər verir ki, 69 yaşlı Siadın meyiti bazar ertəsi axşam Kolomb şəhərindəki mənzilində aşkarlanıb. Fransa hakimiyyəti ölümün səbəbinin müəyyənləşdirilməsi üçün araşdırmaya başlayıb və meyitin yarılması nəzərdə tutulur. Siadın vəkili onun infarkt keçirmiş ola biləcəyini söyləsə də, bu versiya hələ rəsmi ekspertiza ilə təsdiqlənməyib.
Bu barədə “Reuters” məlumat yayıb.
Siadın adı ABŞ Ədliyyə Nazirliyinin Epşteyn işi üzrə açıqladığı sənədlərdə təxminən 2 min dəfə keçir. Elektron yazışmalarda onun müxtəlif ölkələrdə gənc qadınları və modelləri taparaq Epşteynlə tanış etdiyi bildirilir. Siad isə Epşteynlə münasibətlərinin yalnız peşəkar xarakter daşıdığını və onun cinayət fəaliyyətindən xəbərsiz olduğunu iddia edirdi.
“CNN” daha əvvəl apardığı araşdırmada Siadın on ildən artıq müddətdə Epşteyn üçün modellərlə görüşlər təşkil etdiyini bildirmişdi. Siad həmin vaxt telekanala açıqlamasında gənc qadınları qanuni model seçimlərinə göndərdiyini və Epşteynin şəxsi həyatında baş verənlərdən xəbərsiz olduğunu demişdi.
Fransada fevral ayında Epşteynin mümkün yerli əlaqələri, insan alveri və maliyyə cinayətləri üzrə geniş araşdırma başlanıb. İstintaq çərçivəsində 24 qadının ifadə verdiyi, onlardan beşinin Siadı zorlama və insan alverində ittiham etdiyi bildirilir. Bununla belə, ölümünədək ona qarşı bu iddialar üzrə rəsmi ittiham irəli sürülməmiş və həbs qərarı verilməmişdi. Siad bütün ittihamları rədd edirdi.
Prokurorluğun məlumatına görə, Siadın ölümü onunla bağlı mümkün cinayət təqibini dayandırsa da, Epşteyn şəbəkəsinin Fransadakı əlaqələri üzrə ümumi istintaq davam etdiriləcək. Araşdırmaya təxminən on müstəntiqin cəlb olunduğu bildirilir.
Siad Fransada Epşteynlə əlaqəli şəkildə ölən ikinci tanınmış model agentidir. Epşteynin yaxın tərəfdaşlarından Jan-Lük Brunel 2022-ci ildə zorlama və insan alveri ittihamları üzrə məhkəməni gözləyərkən Paris həbsxanasında ölü tapılmışdı.
