Azərbaycan əleyhinə çağırışlar etməkdə və düşmənçiliyi təbliğ etməkdə ittiham olunan 14 İran vətəndaşı ölkə ərazisində “arzuolunmaz şəxs” elan edilib. Onların Azərbaycana girişi qadağan olunub. Siyahıya İran parlamentinin üzvləri, tanınmış din xadimləri, siyasi ekspertlər və media nümayəndələri daxil edilib.
MSNews.az xəbər verir ki, bu barədə noyabrın 3-də “APA” agentliyi məlumat yayıb.
Məlumatda bildirilir ki, son dövrlərdə İranın bəzi ictimai-siyasi xadimləri və media nümayəndələri tərəfindən Azərbaycan dövlətinə, xalqına və rəhbərliyinə qarşı sərt ittihamlar və təhqiramiz ifadələr səsləndirilib.
Həmin şəxslər Azərbaycanın suverenliyinə və təhlükəsizliyinə qarşı çıxmaqda, dini radikalizmi təbliğ etməkdə, dini nifrət və düşmənçiliyi qızışdırmaqda, eləcə də hakimiyyətin zorla dəyişdirilməsinə çağırışlar etməkdə ittiham olunurlar.
Azərbaycanda “arzuolunmaz şəxs” elan edilən 14 İran vətəndaşının siyahısı belədir:
- Ehsan Movəhhediyan – Siyasi təhlilçi, ekspert, Tehran Əllamə Təbabtəbayi Universitetinin müəllimi.
- Əhməd Fərşbafiyan – Təbriz Universiteti nəzdində Qafqaz və Anadolu Araşdırmaları Mərkəzinin keçmiş rəhbəri.
- Kamran Qəzənfəri – İran İslam Şurası Məclisinin deputatı.
- Əlirza Beyqi – İran parlamentinin keçmiş deputatı, siyasi şərhçi.
- Əbülfəzl Zöhrəvənd – İran İslam Şurası Məclisinin deputatı.
- Abbas Moqtədayi Xorasqani – İran İslam Şurası Məclisinin deputatı.
- Əlirza Səlimi – İran İslam Şurası Məclisinin deputatı.
- Hüseyn Şəriətmədari – İranın “Keyhan” qəzetinin baş redaktoru.
- Ayətullah Möhsün Əraki – İranın Ekspertlər Məclisinin və Məsləhət Şurasının üzvü.
- Ayətullah Məhəmməd Cavad Fazil Lənkərani – Qum Elmi Hövzəsinin Müəllifləri və Müəllimləri Cəmiyyətinin üzvü, Əimmeyi-Əthar Fiqh Mərkəzinin rəhbəri.
- Əbdül Hüseyn Xosrov Pənah – İran Ali Mədəni İnqilab Şurasının katibi.
- Hüccətül-islam Qulamrza Kavaşi – Təbriz İmam-cüməsinin və İran Ali Rəhbərinin Şərqi Azərbaycan ostanındakı nümayəndəliyinin ictimaiyyətlə əlaqələr üzrə məsul şəxsi.
- Daryuş Səfərnejad – Professor, siyasi ekspert.
- Əhmədrza Musəvi – Aktyor və teleaparıcı.
Beləliklə, adıçəkilən şəxslərin Azərbaycan ərazisinə daxil olmasına qadağa qoyulduğu bildirilir.
Qeyd edək ki, məlumatı yayan agentlik qərarı qəbul edən konkret dövlət qurumunun adını və hüquqi sənədini açıqlamayıb. Həmin şəxslərə yönəlmiş ittihamların fərdi əsaslandırılması barədə də əlavə məlumat təqdim edilməyib.
