ABŞ Prezidenti Donald Trampın Ağ Evdə təşkil etdiyi Hellouin şənliyində sovet tankçısı formasında oğlan və ənənəvi rus geyimində qız uşağının iştirakı müzakirələrə səbəb olub. Uşaqların Ağ Ev administrasiyasının yüksəkvəzifəli əməkdaşı Stiven Millerin övladları olması barədə iddialar isə təsdiqini tapmayıb.
MSNews.az xəbər verir ki, hadisə oktyabrın 29-da Ağ Evin Cənub qazonunda keçirilən bayram tədbirində baş verib. Donald Tramp və həyat yoldaşı Melaniya Tramp uşaqları qarşılayaraq onlara şirniyyat paylayıblar.
“Ukrainska Pravda” nəşrinin məlumatına görə, qonaqlar arasında sovet hərbi furajkası və tank qoşunlarının nişanı olan forma geyinmiş oğlan, eləcə də rus milli sarafanı və kokoşnikə bənzər baş geyimi taxmış qız diqqət çəkib.
Ağ Evin rəsmi yayımında Melaniya Trampın oğlanın furajkasına diqqət yetirərək ona toxunduğu, daha sonra prezident cütlüyünün uşaqlara şirniyyat verdiyi görünür.
Hadisədən sonra sosial şəbəkələrdə uşaqların Ağ Ev aparatının siyasi məsələlər üzrə rəhbər müavini Stiven Millerin övladları olduğu iddia edilib.
Lakin Çexiyanın “Blesk” nəşri Britaniyanın “The Sun” qəzetinin yayımladığı görüntülərə istinadən Millerin uşaqlarının həmin tədbirdə fərqli kostyumlar geyindiyini bildirib. Buna görə də sözügedən iddia təsdiqlənmiş fakt hesab edilmir.
Sovet hərbi simvollarının Ağ Evdə nümayiş etdirilməsi Ukrayna mediasında və sosial şəbəkələrdə tənqidi reaksiyalara səbəb olub. Bəzi ukraynalı ictimai xadimlər Rusiyanın Ukraynaya qarşı müharibəsi fonunda bu geyim seçimini uyğun hesab etməyiblər.
Hazırda uşaqların kimliyi və kostyumların hansı səbəbdən seçildiyi barədə rəsmi açıqlama yoxdur.
