Şotlandiyada iki ada arasında həyata keçirilən və dünyanın ən qısa müntəzəm sərnişin reysi hesab olunan uçuş cəmi 2,7 kilometrlik məsafəni əhatə edir. Adətən 90 saniyə davam edən uçuşun qeydə alınmış ən qısa müddəti isə 53 saniyədir.
MSNews.az xəbər verir ki, “Sözcü” nəşrinin məlumatına görə, rekord göstərici Şotlandiyanın şimalındakı Orkney arxipelaqında yerləşən Uestre (Westray) və Papa Uestre (Papa Westray) adaları arasındakı aviareysə məxsusdur.

Reys qısa müddətinə baxmayaraq, yerli əhali üçün mühüm nəqliyyat vasitəsidir. Təyyarələr adalar arasında müəllimlərin, tibb işçilərinin, sakinlərin və turistlərin daşınmasını, eləcə də gündəlik xidmətlərin əlçatanlığını təmin edir.
“Loganair” şirkətinin məlumatına görə, bu hava əlaqəsi ucqar adalarda təhsil, səhiyyə və poçt xidmətlərinin davamlılığı baxımından xüsusi əhəmiyyət daşıyır.
53 saniyəlik rekord uçuş pilot Stüart Linkleyter tərəfindən həyata keçirilib. Bununla belə, bu müddət bütün reyslər üçün standart deyil. Adi uçuşlar təxminən 90 saniyə çəkir və hava şəraitindən asılı olaraq müddət dəyişə bilir.
Dünyanın ən qısa aviareysi həm gündəlik nəqliyyat ehtiyacını qarşılayır, həm də qeyri-adi təcrübə yaşamaq istəyən turistlərin marağını cəlb edir.