Fitso: “Ukrayna 45 milyard avronun bir sentini belə qaytarmayacaq”

Slovakiyanın Baş naziri Robert Fitso Aİ-nin Ukraynaya ayırmağı planlaşdırdığı 45 milyard avroluq yeni krediti “hədiyyə” adlandırıb. Bratislava maliyyələşdirmədə iştirak etməyəcəyini açıqlayıb.

12

Slovakiyanın Baş naziri Robert Fitso Avropa İttifaqının (Aİ) Ukraynaya ayırmağı planlaşdırdığı əlavə 45 milyard avroluq krediti “hədiyyə” adlandıraraq Kiyevin bu vəsaiti geri qaytarmayacağını bildirib. O, Slovakiyanın yeni maliyyələşdirmə mexanizmində iştirak etməyəcəyini bəyan edib.

MSNews.az xəbər verir ki, Fitso Aİ-nin beynəlxalq maliyyə bazarlarından borclanaraq Ukraynaya əlavə vəsait ayırmaq planını tənqid edib.

“Avropa İttifaqı Ukraynadakı müharibəni maliyyələşdirmək üçün beynəlxalq maliyyə bazarlarından 45 milyard avro borc götürmək istəyir. Ukraynanın əvvəlki 90 milyard avro kimi, bu vəsaitdən də bir sent qaytarmayacağını bilirlər. Gəlin, həqiqəti danışaq, bunlar kredit deyil, hədiyyədir”, – deyə Fitso bildirib.

Baş nazir xatırladıb ki, Slovakiya Ukrayna üçün əvvəlki 90 milyard avroluq kredit proqramında iştirak etməyib və Bratislava bu mövqeyini dəyişmək niyyətində deyil.

Fitso həmçinin yeni maliyyə yardımının Aİ-nin 2028–2034-cü illər üçün nəzərdə tutulan büdcəsi ilə əlaqələndirilməsinə qarşı çıxıb. O, üzv dövlətlərə bu məsələ ilə bağlı siyasi təzyiq göstərildiyini iddia edib.

“Reuters” agentliyinin məlumatına görə, Fitso daha əvvəl Almaniya Kansleri Fridrix Mertsi Ukraynaya maliyyə dəstəyini Aİ büdcəsi üzrə danışıqlarla əlaqələndirdiyinə görə tənqid etmişdi.

Qeyd edək ki, Avropa Komissiyası noyabrın 18-də Ukraynaya 2027-ci il üçün əlavə 45 milyard avro kredit ayrılmasını təklif edib. Bu vəsait 2026–2027-ci illəri əhatə edən əvvəlki 90 milyard avroluq proqramdan ayrıdır.