Bosniyada siyasi böhran: Dodik ölkəni iflic etməklə hədələdi

Bosniya və Herseqovina Konstitusiya Məhkəməsinin serb nümayəndənin vetosunu etibarsız sayması siyasi böhrana səbəb olub. Milorad Dodik dövlət qurumlarının fəaliyyətini bloklamaqla hədələyib.

25

Bosniya və Herseqovinada Konstitusiya Məhkəməsinin serb nümayəndənin veto qərarını ləğv etməsi ölkədə ciddi siyasi böhrana səbəb olub. Bosniya serblərinin nüfuzlu siyasi lideri Milorad Dodik qərarı Deyton sülh sazişinin prinsiplərinə zidd adlandıraraq dövlət səviyyəsində qərarların qəbulunu bloklamaqla hədələyib.

MSNews.az xəbər verir ki, “N1” telekanalının məlumatına görə, Konstitusiya Məhkəməsi noyabrın 19–20-də keçirilən iclasında Bosniya və Herseqovina Rəyasət Heyətinin serb üzvü Jelka Tsiviyanoviçin veto qərarını etibarsız sayıb.

Mübahisə ölkənin Milli Abidələrin Qorunması Komissiyasına üzvlərin təyin edilməsi ilə bağlıdır. Tsiviyanoviç qərarın Serb Respublikasının həyati maraqlarına zərər vurduğunu əsas gətirərək veto tətbiq etmiş, Serb Respublikasının Milli Assambleyası isə bu mövqeyi dəstəkləmişdi.

Məhkəmə həmçinin Serb Respublikasında 1992–1995-ci illər müharibəsi dövründə Bosniya və Herseqovina Respublikası Ordusunun bayraq və simvollarının nümayişinə qoyulan qadağanı konstitusiyaya zidd hesab edib.

Qərarlara sərt reaksiya verən Milorad Dodik sosial şəbəkədə bunları yazıb:

“Uzun sürən ağır xəstəlikdən sonra bu gün Bosniya və Herseqovina öldü. Onun evtanaziyasını Konstitusiya Məhkəməsi həyata keçirdi. Bu qərarla bütün qırmızı xətlər keçildi. Serb Respublikasının Milli Assambleyasına məxsus hüquqları əlimizdən ala bilməzsiniz”.

Dodik əlavə edib ki, məhkəmə qərarı ləğv olunmayana qədər Bosniya və Herseqovina səviyyəsində heç bir qərarın qəbul edilməsinə imkan verilməyəcək.

Bununla belə, məhkəmə serb nümayəndələrin ümumi veto hüququnu ləğv etməyib. Qərar konkret veto aktının və onu təsdiqləyən parlament qərarının konstitusiyaya uyğunluğuna aiddir.

Qeyd edək ki, 1995-ci ildə imzalanmış Deyton sazişi Bosniya müharibəsinə son qoyaraq ölkənin iki əsas inzibati-siyasi qurumdan — Bosniya və Herseqovina Federasiyası və Serb Respublikasından ibarət dövlət quruluşunu müəyyənləşdirib.

Son məhkəmə qərarları və Dodikin dövlət qurumlarının fəaliyyətini bloklamaq barədə bəyanatı ölkədə onsuz da həssas olan etnik-siyasi münasibətləri daha da gərginləşdirib. Lakin hazırda yeni vətəndaş müharibəsinin başlanacağını təsdiqləyən məlumat yoxdur.

Noyabr 2026
BE ÇA Ç CA C Ş B
 1
2345678
9101112131415
16171819202122
23242526272829
30