ABŞ-da aparılan yeni elmi araşdırma manikür salonlarında çalışan şəxslərin sağlamlığının əvvəllər düşünüldüyündən daha böyük təhlükə altında ola biləcəyini üzə çıxarıb. Nyu-Yorkun gözəllik salonlarında aparılan ölçmələr zamanı havada benzol, metakrilatlar və digər potensial zərərli kimyəvi maddələr aşkarlanıb. Alimlər uzunmüddətli təsirin xərçəng və digər sağlamlıq problemləri riskini artıra biləcəyi barədə xəbərdarlıq edirlər.
MSNews.az xəbər verir ki, araşdırma Nyu-York Şəhər Universitetinin İctimai Sağlamlıq Məktəbinin (CUNY SPH) alimləri tərəfindən aparılıb və nəticələri noyabrın 5-də “Risk Analysis” elmi jurnalında dərc olunub. Tədqiqatçılar Nyu-Yorkda yerləşən beş manikür salonunun havasını bir həftə ərzində dəqiqə-dəqiqə ölçərək işçilərin kimyəvi maddələrə məruz qalma səviyyəsini qiymətləndiriblər.
Araşdırma zamanı havada əsasən aseton, etil asetat, metil asetat və n-butil asetat kimi tez buxarlanan maddələr müəyyən edilib. Bunlarla yanaşı, daha aşağı konsentrasiyalarda benzol və süni dırnaq məhsullarında istifadə edilən metakrilatlar da aşkarlanıb.
Ən diqqətçəkən nəticə isə iş günü ərzində kimyəvi maddələrin konsentrasiyasının dəfələrlə kəskin yüksəlməsi olub. “ScienceAlert” nəşrinin məlumatına görə, bəzi qısamüddətli ölçmələrdə havadakı uçucu üzvi birləşmələrin konsentrasiyası sənaye müəssisələrində müşahidə edilən səviyyələrə yaxınlaşıb.
Alimlər müəyyən ediblər ki, benzolun konsentrasiyası aşağı olsa da, bəzi salonlar üzrə hesablanmış ömürboyu xərçəng riski ABŞ Ətraf Mühitin Mühafizəsi Agentliyinin bir milyon nəfərə bir əlavə hal həddini keçib. Benzol uzunmüddətli təsir zamanı qan hüceyrələrinin yaranmasına mənfi təsir göstərə və leykemiya riskini artıra bilən kanserogen maddədir.
Digər kimyəvi birləşmələrin təsiri isə göz, burun və tənəffüs yollarının qıcıqlanması, sinir sistemi və reproduktiv sağlamlıqla bağlı problemlərlə əlaqələndirilir. Bununla belə, tədqiqat salon işçilərində faktiki xərçəng hallarını araşdırmayıb, yalnız ölçülmüş konsentrasiyalar əsasında potensial riskləri hesablayıb.
Tədqiqatın rəhbəri A. Maykl İerardi bildirib ki, mövcud təhlükəsizlik qiymətləndirmələri çox vaxt səkkiz saatlıq iş günü ərzində maddələrin orta konsentrasiyasına əsaslanır. Lakin bu üsul qısamüddətli, yüksək konsentrasiyalı kimyəvi təsirləri tam əks etdirməyə bilər.
Mütəxəssislər manikür salonlarında havalandırmanın gücləndirilməsini, kimyəvi maddələrə məruzqalmanın daha dəqiq izlənilməsini və işçilərin mühafizəsinin artırılmasını tövsiyə edirlər. CUNY-nin əvvəlki araşdırması göstərib ki, mövcud ventilyasiya sistemlərindən düzgün istifadə bəzi salonlarda havadakı uçucu kimyəvi maddələrin orta konsentrasiyasını 82 faizə qədər azalda bilər.
