İspaniyanın paytaxtı Madriddə minlərlə insan Seutadakı kütləvi miqrasiya böhranının idarə olunmasına etiraz edərək Baş nazir Pedro Sançesin istefasını və növbədənkənar parlament seçkilərinin keçirilməsini tələb edib. Hökumət nümayəndəliyi aksiyaya 20 min nəfərin qatıldığını, təşkilatçılar isə iştirakçı sayının 180 min olduğunu bildirib.
MSNews.az xəbər verir ki, “Euronews” nəşrinin məlumatına görə, “Ləyaqət yürüşü” adlandırılan aksiya “Sociedad Civil Española” platforması tərəfindən təşkil olunub. Yürüşə mühafizəkar Xalq Partiyası (PP) və sağçı Vox partiyası da dəstək verib. Nümayişçilər Cibeles meydanından Moncloadakı Zəfər Tağına doğru yürüş ediblər.
Aksiyanın əsas mövzularından biri iyulun sonunda Mərakeşdən İspaniyanın Şimali Afrikadakı Seuta ərazisinə baş verən kütləvi miqrant axını olub. İspaniya hökumətinin məlumatına görə, böhrandan sonra minlərlə miqrant ölkənin digər ərazilərinə köçürülüb və ya geri qaytarılıb, lakin Seutada vəziyyət hələ tam normallaşmayıb.
İspaniyanın “RTVE” telekanalının məlumatına görə, hazırda Seutada yaradılmış müxtəlif mərkəzlərdə təxminən 8 300 qeyri-qanuni miqrant yerləşdirilib, daha 4 mindən çox insanın isə küçələrdə qaldığı hesab edilir.
Aksiyada Vox lideri Santyaqo Abaskal və PP-nin baş katibi Migel Tellado da iştirak ediblər. Hər iki siyasi qüvvə hökumətin Seuta böhranına reaksiyasını tənqid edərək növbədənkənar ümumi seçkilərin keçirilməsini tələb edib.
Baş nazir Pedro Sançes hökumətin Seutanı tək buraxması ilə bağlı ittihamları rədd edir. O, sentyabrın əvvəlində parlamentdəki çıxışında təhlükəsizlik qüvvələrinin sayının artırıldığını, səhiyyə sisteminə əlavə əməkdaşların cəlb edildiyini, miqrantların yerləşdirilməsi və geri qaytarılması prosesinin sürətləndirildiyini bildirib.
