Yaponiyanın paytaxtı Tokioda iştirakçıların sadəcə yatmaqla 2,22 milyon yenlik baş mükafat uğrunda mübarizə aparacağı qeyri-adi “yuxu yarışması” keçiriləcək.
MSNews.az xəbər verir ki, “Mattress Race by Koala” adlı tədbir oktyabrın 5-də Tokionun Minami Aoyama rayonundakı SHARE GREEN MINAMI AOYAMA məkanında təşkil olunacaq. Tədbirin rəsmi saytının məlumatına görə, iştirakçılar xüsusi ölçmə cihazları taxaraq eyni vaxtda 90 dəqiqə yatmağa çalışacaqlar.
Qalib sadəcə ən uzun yatan şəxs olmayacaq. Sensorlardan əldə edilən məlumatlar əsasında yuxunun dərinliyi və keyfiyyəti, yuxuya getmə müddəti və yuxunun sabitliyi qiymətləndiriləcək. Həkim nəzarəti altında hazırlanmış meyarlar əsasında hər iştirakçı üçün xüsusi “yuxu balı” hesablanacaq. Üç yarış üzrə ən yüksək nəticəni göstərən şəxs 2,22 milyon yen baş mükafata sahib olacaq. “PR Times” bildirir ki, məbləğ yuxunu ifadə edən “Zzz” səsinə uyğun olaraq seçilib.
Təşkilatçılar əlavə olaraq dərin yuxunu qiymətləndirən “Deep Sleep Dive Award” və qeyri-adi yatış vəziyyətlərinə görə veriləcək “Sleep-Turn Acrobat Award” kimi xüsusi nominasiyalar da nəzərdə tutublar. Yarış zamanı iştirakçılara təsadüfi “yuxu əşyaları” təqdim ediləcək, hətta onların yuxusunu gözlənilmədən poza biləcək xüsusi sınaqların keçirilməsi də planlaşdırılır.
Yarış üç sessiyadan ibarət olacaq və hər birində təxminən 20 nəfər iştirak edəcək. Qeydiyyat pulsuzdur. Müraciətlər sentyabrın 4-dən 16-dək qəbul edilir, iştirakçı sayı çox olarsa seçim püşkatma yolu ilə aparılacaq. Yarışa yalnız 20 yaşdan yuxarı şəxslər buraxılır. İştirakçıların üstünlük əldə etmək üçün əvvəlcədən qəsdən yuxusuz qalması və ya yuxugətirici dərmanlardan istifadə etməsi qadağandır.
Tədbirin əsas məqsədlərindən biri Yaponiyada yuxu çatışmazlığı probleminə diqqət çəkməkdir. Təşkilatçılar OECD-nin 2021-ci il məlumatlarına istinad edərək yaponların orta hesabla gündə təxminən 7 saat 22 dəqiqə yatdığını və bunun müqayisə edilən 33 ölkə arasında ən aşağı göstərici olduğunu bildirirlər.
