ABŞ Prezidenti Donald Tramp İranla bağlı mühüm qərar verməli olduğunu bildirərək Tehranla razılaşma əldə edilməsi və ya ölkəyə qarşı hərbi əməliyyatların genişləndirilməsi variantlarından danışıb. O, razılaşmanın İrana yenidən qurulmaq imkanı verə biləcəyini, əks halda isə İran İslam Respublikasına qarşı ağır hərbi zərbələr endirilə biləcəyini söyləyib.
MSNews.az xəbər verir ki, Tramp bu fikirləri sentyabrın 22-də Nyu-Yorkda BMT Baş Assambleyasındakı çıxışında səsləndirib. ABŞ Prezidenti qarşısında iki variantın olduğunu deyib: İranın yenidən qurulmasına imkan yaradacaq razılaşma əldə etmək və ya İran İslam Respublikasını qısa müddətdə məhv etməyə yönəlmiş hərbi addımlar atmaq.
Tramp mümkün hərbi variantdan danışarkən İran rəhbərliyinə qarşı son dərəcə sərt ifadələr işlədib. Bununla yanaşı, İranla razılaşma əldə olunacağına inandığını da bildirib. O, mümkün razılaşmanın ABŞ-də noyabrda keçiriləcək aralıq seçkilərindən sonra əldə oluna biləcəyini söyləyib.
Çıxışdan sonra Tramp ABŞ və İran nümayəndələri arasında Nyu-Yorkda danışıqlar aparıldığını açıqlayıb və görüşü müsbət qiymətləndirib. ABŞ-nin xüsusi nümayəndəsi Stiv Uitkoff da təmasların keçirildiyini bildirib. İran tərəfi isə danışıqların vasitəçilər üzərindən aparıldığını qeyd edib. Tərəflər arasında yekun razılaşma əldə olunduğu açıqlanmayıb.
