Qəzzada mülki ölümləri və İsrail ordusunun hədəf seçmə sistemlərini araşdıran “NAZA” sənədli filminin Venesiya Film Festivalında mükafat qazanması İsraildə ciddi siyasi qalmaqala səbəb olub. Filmin israilli rejissorları Yuval Abraham və Rachel Szor “dövlətə xəyanətdə” ittiham ediliblər.
MSNews.az xəbər verir ki, “NAZA” 83-cü Venesiya Beynəlxalq Film Festivalında Xüsusi Münsiflər Mükafatına layiq görülüb. Festivalın rəsmi saytında filmin rejissorlarının Yuval Abraham və Rachel Szor olduğu təsdiqlənir.
80 dəqiqəlik sənədli film üç il ərzində məxfi şəkildə çəkilib və 24 israilli hərbçi və kəşfiyyat əməkdaşının anonim ifadələrinə əsaslanır. Filmdə İsrail ordusunun Qəzzada potensial hədəflərin müəyyənləşdirilməsi zamanı süni intellekt sistemlərindən istifadəsi və zərbələrin mülki əhali üçün yaratdığı nəticələr araşdırılır.
“Associated Press”-in məlumatına görə, İsrail ordusu süni intellektdən istifadə etdiyini təsdiqləsə də, son qərarın insan tərəfindən verildiyini bildirir və filmdə irəli sürülən əsas iddiaları rədd edir.
Mükafatdan sonra İsrailin mədəniyyət naziri Miki Zohar rejissorları sərt şəkildə tənqid edib. O, Abraham və Szorun ölkəyə “xəyanət etdiyini” bildirib və onların İsrail vətəndaşlığından məhrum edilməsi üçün addımlar atacağını açıqlayıb. “The Times of Israel” bu çağırışın festivaldakı mükafatdan dərhal sonra səsləndiyini yazıb.
“Associated Press” bildirir ki, Baş nazir Benyamin Netanyahu da filmi antisemitizm və İsrail əleyhinə təbliğatla əlaqələndirib. İsrail ordusunun Baş Qərargah rəisi Eyal Zamir isə filmdə iştirak edən hərbçilərlə bağlı mümkün məlumat sızmalarının araşdırılmasını istəyib.
Rejissorlar isə filmin məqsədinin İsrail cəmiyyətində Qəzzada baş verənlərlə bağlı müzakirə yaratmaq olduğunu bildirirlər. Abraham mükafatı qəbul edərkən israillilərin filmi izləməsinin vacib olduğunu deyib və sənədli filmdə göstərilən hadisələrin araşdırılmasının zəruriliyini vurğulayıb.
Filmin rəsmi təqdimatında “NAZA”nın İsrailin Qəzzada mülki şəxslərin öldürülməsinə gətirib çıxaran hərbi sistemlərini araşdırdığı bildirilir. İsrail ordusu isə sənədli filmdəki anonim ifadələrin yoxlanmasının mümkün olmadığını və ittihamların yanlış təsəvvür yaratdığını bəyan edib.
