Belarus Prezidenti Aleksandr Lukaşenko ABŞ lideri Donald Trampa Nobel Sülh Mükafatının verilməsinə çağırıb. O bildirib ki, Trampın siyasəti ziddiyyətli olsa da, Amerika Prezidenti Avropanı nüvə münaqişəsi ilə nəticələnə biləcək Üçüncü Dünya müharibəsindən çəkindirir.
MSNews.az xəbər verir ki, Lukaşenko bu fikirləri noyabrın 3-də Minskdə keçirilən IV Beynəlxalq Avrasiya Təhlükəsizliyi Konfransında səsləndirib. Bu barədə “Kommersant” və “Anadolu Agentliyi” məlumat yayıb.
“İnsan istəyirsə, vermək lazımdır! Özü də fərqinə varmadan o, həqiqətən də ana Avropanı nüvə münaqişəsi ilə nəticələnə biləcək Üçüncü Dünya müharibəsindən saxlayır”, – deyə Belarus lideri bildirib.
Lukaşenko qeyd edib ki, Trampın siyasəti dünyada qütbləşməni gücləndirir və haqlı tənqidlərə səbəb olur. Bununla belə, onun fikrincə, ABŞ Prezidentinin Ukraynadakı müharibənin dayandırılması istiqamətində fəaliyyəti mühüm əhəmiyyət daşıyır.
“Trampın siyasəti dünyanı qütbləşdirir. Lakin onun ziddiyyətli addımları belə dünyanı nüvə müharibəsinə çevrilə biləcək Üçüncü Dünya müharibəsindən qoruyur”, – deyə Lukaşenko vurğulayıb.
Belarus Prezidenti xəbərdarlıq edib ki, Rusiya ilə Ukrayna arasında müharibə dayandırılmasa, qarşıdurma daha genişmiqyaslı beynəlxalq münaqişəyə çevrilə bilər.
O, eyni zamanda Ukraynadakı müharibənin yaxın aylarda başa çata biləcəyi barədə şəxsi qənaətini bölüşüb və Minskin mümkün sülh danışıqlarına ev sahibliyi etməyə hazır olduğunu bildirib.
Lukaşenko Nobel mükafatına şəxsi münasibətini də açıqlayıb. O qeyd edib ki, mükafat ona və ya Rusiyanın xarici işlər naziri Sergey Lavrova təklif edilsəydi, onu qəbul etməzdilər.
Qeyd edək ki, Lukaşenkonun Trampın nüvə müharibəsinin qarşısını aldığı barədə sözləri onun siyasi qiymətləndirməsidir. ABŞ Prezidentinin Nobel Sülh Mükafatına namizədliyinin irəli sürülməsi və mükafatın verilməsi barədə yeni rəsmi qərar açıqlanmayıb.
