Türkiyənin müdafiə sənayesi şirkəti ASELSAN ölkənin Müdafiə Sənayesi Başkanlığı ilə hibrid hava hücumundan müdafiə sistemlərinin tədarükünə dair ümumi dəyəri 2,46 milyard avro olan müqavilələr imzalayıb. Bu paket ASELSAN-ın indiyədək açıqladığı ən böyük müqavilədir.
MSNews.az xəbər verir ki, müqavilələr barədə məlumat Türkiyənin İctimaiyyəti Məlumatlandırma Platformasında — KAP-da açıqlanıb. ASELSAN bildirib ki, razılaşmalar şirkətin gəlirlərinə müsbət təsir göstərəcək. Təchizatın dəqiq qrafiki və müqaviləyə daxil olan sistemlərin tam siyahısı isə açıqlanmayıb.
“Hürriyet Daily News” yazır ki, yeni sifarişlər Türkiyənin qurduğu “Polad Qübbə” hava müdafiə sisteminin inkişafına yönəldiləcək. Sistem KORKUT, HİSAR və SİPER kimi müxtəlif mənzilli müdafiə vasitələrini radarlar, sensorlar və vahid komanda-idarəetmə infrastrukturu ilə bir şəbəkədə birləşdirməyi nəzərdə tutur.
“Polad Qübbə” ayrı-ayrı zenit-raket kompleksindən daha geniş konsepsiyadır. Layihə müxtəlif hündürlük və məsafələrdə aşkarlanan hava təhdidlərinin vahid şəbəkə vasitəsilə müəyyənləşdirilməsi, izlənməsi və zərərsizləşdirilməsi üçün çoxqatlı inteqrasiya olunmuş hava müdafiə arxitekturası kimi hazırlanır. Buraya uzunmənzilli hava və raket müdafiəsi, erkən xəbərdarlıq sistemləri və pilotsuz uçuş aparatlarına qarşı vasitələr də daxildir.
ASELSAN-ın baş direktoru Ahmet Akyol bildirib ki, davam edən seriyalı istehsal layihələri Türkiyənin “Polad Qübbə” sistemini daha da gücləndirir və ölkənin hava məkanının müdafiə imkanlarını artırır.
Şirkət 2026-cı ildə hava müdafiəsi sahəsində artıq bir neçə iri müqavilə açıqlayıb. İyulda ASELSAN HİSAR sistemlərinin əlavə seriyalı istehsalı da daxil olmaqla təxminən 1,47 milyard avroluq müqavilə imzalamışdı. Yeni 2,46 milyard avroluq paket isə həmin proqramların miqyasının daha da genişləndirildiyini göstərir.
