Polşanın Krakov şəhərində 6 nəfərin ölümü ilə nəticələnən silahlı hücumu törətməkdə şübhəli bilinən şəxsin hərbi təchizatında Ukraynada döyüşən xarici könüllülərlə əlaqələndirilən Forward Observations Group (FOG) nişanının olduğu iddia edilir. Lakin onun Ukrayna Silahlı Qüvvələri ilə hər hansı əlaqəsi rəsmi təsdiqini tapmayıb.
MSNews.az xəbər verir ki, Rusiyanın “SHOT” nəşrinin yaydığı iddiaya əsasən, şübhəlinin üzərində ABŞ mənşəli FOG qrupu ilə əlaqələndirilən nişan müşahidə olunub.
Polşanın “Halo Rzeszów” nəşri də yayılan görüntüləri araşdırıb. Nəşrin məlumatına görə, təchizatda görünən simvol FOG ilə əlaqələndirilən nişanlardan birinə bənzəyir. Bununla belə, həmin nişanların sərbəst satışda olması onların sahibinin hərbi təşkilatın üzvü olduğunu sübut etmir.
Sosial şəbəkələrdə hücumçunun Ukrayna tərəfində döyüşən Beynəlxalq Legionla mümkün əlaqəsinə dair ehtimallar da yayılıb. Lakin onun bu birləşmədə xidmət etdiyini təsdiqləyən sənəd və ya rəsmi açıqlama mövcud deyil.
Polşanın müdafiə naziri Vladislav Kosinyak-Kamış isə şübhəlinin Polşa ordusunda xidmət etməsi barədə məlumatları təkzib edib. Nazir bildirib ki, həmin şəxs nə hazırda, nə də keçmişdə Polşa Silahlı Qüvvələrinin hərbçisi olub. Bu barədə “Radio Kraków” məlumat yayıb.
Xatırladaq ki, noyabrın 7-də Krakovun mərkəzində baş verən silahlı hücum nəticəsində 6 nəfər ölüb, ən azı 15 nəfər yaralanıb. “Reuters” agentliyinin məlumatına görə, hücumçu polis tərəfindən yaralanaraq saxlanılıb. Hadisənin motivləri araşdırılır.
Hazırda şübhəlinin FOG və ya Ukraynanın Beynəlxalq Legionu ilə əlaqəsi barədə iddiaları təsdiqləyən etibarlı sübut yoxdur. Polşa hüquq-mühafizə orqanlarının belə bir əlaqəni ayrıca araşdırdığına dair məlumat da rəsmi təsdiqini tapmayıb.
