İsrail ordusunun İordan çayının işğal altındakı qərb sahilində iki keçid məntəqəsini bağlaması nəticəsində 104 fələstinli müəllim məktəblərə çata bilməyib. Məhdudiyyətlər təxminən 1 100 uşağın təhsil aldığı altı məktəb və bir uşaq bağçasında dərslərin gedişini pozub.
MSNews.az xəbər verir ki, bu barədə sentyabrın 20-də Fələstinin “WAFA” agentliyi Tubas vilayətinin təhsil idarəsinin direktoru Əzmi Bəlavnəyə istinadən məlumat yayıb.
Bəlavnənin sözlərinə görə, İordan vadisinin şimalında yerləşən Təyasir və Eyn-Şibli keçid məntəqələrinin bağlanması müəllimlərin iş yerlərinə çatmasına mane olub. Nəticədə altı dövlət məktəbi və bir uşaq bağçasında tədris prosesi pozulub.
Eyni gün Ramallahın şərqindəki Əl-Muğəyyir kəndində də hərəkət məhdudiyyətləri tətbiq edilib. “Anadolu” agentliyinin yerli mənbələrə istinadən yaydığı məlumata görə, İsrail hərbçiləri kəndin girişini bağlayıb, yaşayış evlərində axtarışlar aparıb və onlarla fələstinlini saxlayıblar.
Yerli mənbələr bildiriblər ki, hərbi texnika və pilotsuz uçuş aparatının iştirakı ilə keçirilən əməliyyat zamanı giriş yolunun bağlanması uşaqların məktəbə, sakinlərin isə iş yerlərinə getməsini çətinləşdirib.
Əl-Muğəyyir kəndində hərəkət məhdudiyyətləri bundan əvvəl də qeydə alınıb. BMT-nin Humanitar Məsələlərin Əlaqələndirilməsi İdarəsinin sentyabr hesabatında kəndin giriş yollarına tətbiq olunan uzunmüddətli məhdudiyyətlərin sakinlərin gündəlik həyatına təsir etdiyi qeyd olunub.
İsrail ordusunun sentyabrın 20-də Təyasir və Eyn-Şibli keçidlərinin bağlanması ilə bağlı konkret izahı sözügedən məlumatlarda yer almayıb.
