Qrenlandiyanın paytaxtı Nuuk şəhərində maraqlı insident baş verib: bir şəxs ABŞ bayrağını qaldırmağa cəhd edib, lakin yerli sakinlər dərhal bu hərəkətə müdaxilə edərək onu dayandırıblar. Hadisə adanın gərgin siyasi və ictimai mühiti fonunda müşahidə olunub.
Bavariyalı komediyaçı 41 yaşlı Maksi Şafrot, Nuukdakı mədəniyyət mərkəzinin yaxınlığında ABŞ bayrağını dirəyə qaldırmağa çalışıb. Lakin ətrafdakı sakinlər və mərkəz əməkdaşları bu addımı görərək dərhal onun qarşısını alıblar. Şafrot yerli sakinlərlə qarşılaşdıqda özünü ABŞ rəsmi nümayəndəsi kimi təqdim etməyə çalışıb, amma buna baxmayaraq bayraq qaldırılmayıb. Daha sonra polisə məlumat verilib və ona cərimə tətbiq olunub.
Nuuk şəhərinin meri Avaaraq Olsen bildirib ki, belə hərəkətlər “zarafat və ya əyləncə” məqsədi daşıya bilər, amma hazırkı geosiyasi vəziyyət nəzərə alınanda bu cür hərəkətlər “son dərəcə zərərli və məsuliyyətsiz”dir. Olsen yerli media və məzmun yaradıcılarını “daha məsuliyyətli davranmağa” çağırıb.
Hadisə, ABŞ-ın Arktikada artan maraqları və Qrenlandiyanın strateji əhəmiyyəti ilə əlaqədar ictimai hisslərin yüksək olduğu bir dövrdə baş verib. Bölgədə bəzi qruplar ABŞ-ın ada üzərində təsirini artırmaq cəhdlərinə qarşı çıxırlar.
