İranın “Iran Air” aviaşirkəti Bakı, İstanbul və Nəcəf istiqamətlərində uçuşlarını davam etdirdiyini açıqlayıb. Şirkətin məlumatına görə, bu marşrutlar üzrə reyslər mövcud cədvələ uyğun həyata keçirilir.
MSNews.az xəbər verir ki, aviaşirkət Türkiyə, Azərbaycan və İraqın müvafiq aviasiya qurumlarından reyslərin dayandırılması və ya təxirə salınması barədə rəsmi bildiriş almadığını bildirib. “Iran Air” qeyd edib ki, hər hansı yeni rəsmi göstəriş daxil olana qədər uçuşları planlaşdırılmış qaydada yerinə yetirmək niyyətindədir.
Şirkətin yayımladığı uçuş cədvəlinə əsasən, Tehran–Bakı reysləri həftənin bazar ertəsi, cümə axşamı və cümə günləri nəzərdə tutulub. İstanbul və İraqın Nəcəf şəhərinə uçuşlar da aviaşirkətin beynəlxalq marşrutları sırasındadır.
Açıqlama İran aviasiya sektoruna tətbiq edilən sanksiyalar fonunda verilib. İranın digər aviaşirkəti “Mahan Air” Türkiyəyə bəzi reyslərini dayandırdığını bildirsə də, bu qərar “Iran Air”in Bakı uçuşlarının dayandırılması demək deyil.
Aviaşirkət sərnişinlərə uçuşdan əvvəl aktual cədvəli və mümkün dəyişiklikləri onun rəsmi məlumat kanallarından yoxlamağı tövsiyə edir.
