Bakının 286 nömrəli tam orta ümumtəhsil məktəbində ağır insident baş verib. Bakı Şəhəri üzrə Təhsil İdarəsinin yerli mediaya verdiyi məlumata görə, 20 aprel tarixində məktəbin IX sinif şagirdi sinif yoldaşına xəsarət yetirib. Məktəb rəhbərliyi dərhal təcili tibbi yardım çağırıb, zərərçəkən şagirdə ilkin yardım göstərilib və o, xəstəxanaya aparılıb.
Yerli səhiyyə məlumatlarına görə, 2011-ci il təvəllüdlü yeniyetmə Nərimanov Tibb Mərkəzinin nəzdində olan Yanıq Mərkəzinə yerləşdirilib. Ona başın, üzün, boynun, gövdənin ön səthinin və hər iki yuxarı ətrafın II-III dərəcəli termiki alov yanığı diaqnozu qoyulub. Hazırda pasiyentin müalicəsi reanimasiya şöbəsində davam edir və vəziyyəti ağır qiymətləndirilir.
Məlumatlarda bildirilir ki, hadisə sinif yoldaşının üzərinə spirt tökülərək yandırılması ilə bağlıdır. Hadisəni törətməkdə şübhəli bilinən şəxs polis əməkdaşları tərəfindən saxlanılıb. Faktla bağlı araşdırma aparılır.
Hadisə cəmiyyətdə məktəblərdə təhlükəsizlik, şagird davranışı və psixoloji nəzarət məsələlərini yenidən gündəmə gətirib. Hazırda rəsmi qurumlar tərəfindən hadisənin motivi ilə bağlı ətraflı açıqlama verilməyib.
