Qaqik Tsarukyanın rəhbərlik etdiyi “Çiçəklənən Ermənistan” Partiyası ilkin nəticələrə görə Ermənistan parlamentinə keçə bilmir.
MSNews.az xəbər verir ki, “Armenpress” Ermənistan Mərkəzi Seçki Komissiyasına istinadən partiyanın parlament seçkilərində 58378 səs və ya 3,996% nəticə göstərdiyini yazıb. Bu göstərici partiyalar üçün müəyyən edilmiş 4 faizlik keçid baryerindən çox az aşağıdır.
Ermənistan seçki qanunvericiliyinə görə, partiyalar parlamentdə təmsil olunmaq üçün ən azı 4%, bloklar isə daha yüksək keçid həddini aşmalıdır. “Çiçəklənən Ermənistan” Partiyasının nəticəsi 4%-dən cüzi fərqlə aşağı olduğu üçün partiya ilkin mandat bölgüsünə əsasən yeni Milli Assambleyada təmsil olunmayacaq.
“Çiçəklənən Ermənistan” əvvəlki ilkin hesablamalarda 4 faizlik minimum həddə çatmış kimi görünsə də, yenilənmiş nəticələrdə baryerdən kənarda qalıb. Ermənistan MSK sədri Vaaqn Hovakimyan isə bu rəqəmlərin hələ ilkin olduğunu və qarşıda yoxlama və yenidən sayım mərhələsinin olduğunu bildirib.
Partiya nəticələrlə razılaşmır və səslərin yenidən hesablanmasını tələb etməyə hazırlaşır. “News.am”un məlumatına görə, partiya sədri Qaqik Tsarukyanın mətbuat katibi İveta Tonoyan bildirib ki, “Çiçəklənən Ermənistan” MSK-ya yenidən sayım üçün müraciət edəcək, bütün hüquqi vasitələrdən istifadə edəcək və seçki pozuntularının araşdırılmasına çalışacaq.
Tonoyanın sözlərinə görə, partiyanın qərargahı hazırda yenidən sayım tələb olunacaq seçki məntəqələrinin siyahısını yekunlaşdırır. Eyni zamanda, seçki prosesi zamanı qəbul edilmiş bəzi qərarlar və hərəkətlərdən şikayət etmək üçün hüquqi əsaslar müzakirə olunur.
“Armenpress”in məlumatına görə, bütün 2005 seçki məntəqəsində səslərin hesablanmasından sonra hakim “Vətəndaş Müqaviləsi” partiyası 727 160 səs və ya 49,825% nəticə ilə birinci olub. “Güclü Ermənistan” bloku 340 088 səs və ya 23,281%, “Ermənistan” bloku isə 145 113 səs və ya 9,934% toplayıb.
