Kiprdə BMT-nin nəzarətində olan bufer zonanın Pyla/Pile kəndi yaxınlığında gərginlik artıb. BMT-nin Kiprdəki sülhməramlı missiyası UNFICYP bildirib ki, türk-kipr təhlükəsizlik personalının bufer zonaya icazəsiz daxil olması və orada fəaliyyət göstərməsi onun mandatının pozulması sayılır. Missiya vəziyyətə görə patrullarını artırdığını və tərəflərlə təmasların gücləndirildiyini açıqlayıb.
MSNews.az xəbəri yerli mediaya istinadən verir.
Kipr mediası və Kipr Xəbər Agentliyinə istinad edən materiallarda Türkiyə tərəfinin həmin istiqamətə təxminən 15 tank göndərdiyi, mülki geyimdə onlarla şəxsin ərazidə göründüyü və yeni bayraq quraşdırıldığı iddia olunur. “Ekathimerini” də BMT missiyasının yaxın ərazilərdə təxminən 15 tankın yerləşdirildiyini müşahidə etdiyini yazıb.
Amma UNFICYP sözçüsü Alim Siddik sonradan bildirib ki, tanklar və bayraqların yerləşdirilməsi barədə yayılan bəzi xəbərlər dəqiqləşdirilməlidir: onun sözlərinə görə, hərbi texnika və bayraqlar bufer zonanın daxilində yox, ona yaxın, şimal atəşkəs xəttinin o tərəfində müşahidə olunub.
Britaniyanın Dekeliya bazasından əlavə qüvvələrin cəlb olunması barədə məlumat da Kipr media xətti ilə yayılıb.
Hadisənin fonunda daha köhnə Pyla yol böhranı da yenidən yada düşür. 2023-cü ildə eyni zona ətrafında yol tikintisi və BMT sülhməramlılarına hücum səbəbilə ciddi gərginlik yaşandığını xatırlanır. Hazırkı insident də həmin həssas bölgədə status-kvonun hər hansı dəyişməsinin necə sürətlə böhran yarada bildiyini göstərir.
