ABŞ Prezidenti Donald Trampın CNN, MS NOW və “Politico” jurnalistlərinin Ağ Evə girişini qadağan etməsindən sonra beş aparıcı telekanal prezidentin tədbirlərinin birgə televiziya çəkilişlərini müvəqqəti dayandırıb. Tramp isə Nyu-Yorkda jurnalistlərlə söhbəti zamanı mətbuat nümayəndələrinin onu boykot etmədiyini bildirib.
MSNews.az xəbər verir ki, Tramp sentyabrın 18-də CNN, MS NOW və “Politico”-nun Ağ Evə girişini qadağan etdiyini açıqlayıb. Prezident qərarını həmin media qurumlarının onun fikrincə, saxta xəbərlər yayması ilə əsaslandırıb. Ertəsi gün hər üç nəşrin əməkdaşları Ağ Evə buraxılmayıblar.
Buna cavab olaraq, ABC News, CBS News, CNN, Fox News və NBC News prezidentin səfər və tədbirlərini növbəli qaydada çəkərək digər KİV-lərə təqdim edən televiziya jurnalistləri hovuzunun fəaliyyətini dayandırıblar. “CBS News” yazır ki, CNN sentyabrın 21-də Trampın Nyu-Yorka səfərini işıqlandırmalı idi, lakin onun yerinə başqa telekanal çəkiliş qrupu göndərilməyib.
Telekanalların birgə bəyanatında ictimaiyyətin hökumətin fəaliyyəti barədə dəqiq və müstəqil məlumat əldə etməkdə maraqlı olduğu vurğulanıb. Onlar administrasiyanın hər hansı media qurumunun xəbərlərinin təqdimatını bəyənmədiyi üçün onun fəaliyyətini məhdudlaşdırmamalı olduğunu bildiriblər.
Tramp sentyabrın 21-də Nyu-York meri Zöhran Məmdani ilə görüşündən sonra jurnalistlərin sualını cavablandırarkən boykot çağırışlarına istehza ilə yanaşıb: “Onlar məni boykot edəcəklərini deyirdilər, amma heç vaxt boykot etmirlər. Görün burada nə qədər mətbuat nümayəndəsi var”. Prezident KİV-lərin obyektiv olmalı olduğunu deyərək saxta xəbərlər yaydığını düşündüyü media qurumlarını Ağ Evə buraxmamaq qərarını müdafiə edib.
Televiziya hovuzunun fəaliyyətinin dayandırılması bütün KİV-lərin Tramp barədə xəbər yaymaqdan imtina etməsi demək deyil. Qərar prezidentin məhdud sayda jurnalistin iştirak edə bildiyi tədbirlər üçün təşkil olunan ortaq televiziya çəkilişlərinə aiddir.
CNN, MS NOW və Politico isə Ağ Evə girişlərinin bərpası üçün məhkəməyə müraciət ediblər. Onlar qadağanın ABŞ Konstitusiyasının mətbuat azadlığını qoruyan Birinci Düzəlişinə zidd olduğunu bildirirlər.
