Albaniyanın paytaxtı Tiranada “İsrail Mədəniyyəti Həftəsi” ərəfəsində asılan İsrail bayraqları ictimai müzakirələrə səbəb olub.
MSNews.az-ın “JNS” nəşrinə istinadən məlumatına görə, iyunun 9-da Tirananın əsas küçələrindən biri “İsrail Mədəniyyəti Həftəsi” münasibətilə İsrail bayraqları ilə bəzədilib. Nəşr fotonun İsrailin Albaniyadakı səfirliyinə aid olduğunu qeyd edib.
“JNS” yazır ki, İsrail Mədəniyyəti Həftəsi Albaniyanın Beynəlxalq Mədəniyyət Həftəsi proqramının bir hissəsidir və Tiranada, eləcə də ölkənin digər şəhərlərində keçirilir. İsrailin Albaniyadakı səfiri Qalit Peleq bildirib ki, bu tədbir iki ölkə arasında mədəni və ictimai əlaqələri gücləndirməyi hədəfləyir.
Lakin Qəzza müharibəsi fonunda Tiranada İsrail bayraqlarının nümayişi sosial şəbəkələrdə və yerli mediada mübahisə yaradıb. “Gazeta Tema” İsrail səfirinin paylaşımına istinadən yazıb ki, bayraqların bulvarda asılması bir sıra istifadəçilərin tənqidinə səbəb olub. Şərhlərdə bəziləri belə bir tədbirin hazırkı regional vəziyyət fonunda uyğun olmadığını bildiriblər.
Sosial şəbəkələrdə yayılan məlumatlara görə, tənqid dalğasından və mümkün təxribatlarla bağlı narahatlıqlardan sonra bayraqların bir hissəsi sonradan yığışdırılıb. Bununla belə, Tirana meriyası və ya Albaniya hökuməti tərəfindən bayraqların rəsmi qərarla çıxarılması barədə açıq təsdiq hələlik yayılmayıb.
Albaniyada İsrail və Qəzza mövzusu son aylarda daha həssas siyasi gündəmə çevrilib. “Middle East Monitor” daha əvvəl yazmışdı ki, yanvarda Tiranada baş nazir Edi Ramanın İsrail səfərinə qarşı Fələstin tərəfdarı etiraz aksiyası keçirilib. Aksiya iştirakçıları hökumətin İsrailə münasibətini tənqid edərək Qəzzada mülki əhalinin vəziyyətinə diqqət çəkiblər.
Paralel olaraq, Albaniyada son günlər hökumətə qarşı daha geniş etirazlar da davam edir. “Reuters” yazır ki, minlərlə insan Tiranada Jared Kushnerlə əlaqələndirilən kurort layihəsinə və Edi Rama hökumətinin fəaliyyətinə etiraz edir. Bu ümumi narazılıq fonunda İsrail bayraqları ilə bağlı müzakirələr də daha emosional xarakter alıb.
