Tailand və Kamboca sərhədində həftələrdir davam edən qanlı döyüşləri dayandırmaq üçün yeni bir atəşkəs müqaviləsi imzalanıb. Razılaşma 27 dekabr 2025-ci il tarixində, yerli vaxtla günorta saatlarında qüvvəyə minib və qarşılıqlı olaraq hərbi əməliyyatların və hava sahəsi pozuntularının dayandırılmasını nəzərdə tutur.
Yeni atəşkəs sənədi ilə hər iki tərəf hərbi hərəkətlərdən çəkinməyi və hava sahəsini hərbi məqsədlərlə pozmamağı qəbul edib. Razılaşma çərçivəsində həmçinin sərhəd boyunca müşahidə məntəqələrinin yaradılması və minalardan istifadənin qarşısının alınması barədə öhdəliklər yer alır.
Müqavilə, Tailand və Kamboca müdafiə nazirləri Tea Seiha və Nattaphon Narkphanit tərəfindən sərhəd nəzarət məntəqəsində imzalanıb. Bu addım üç gün davam edən hərbi danışıqlardan sonra həyata keçirilib.
Tailandın daimi hücumları və hava zərbələri nəticəsində çox sayda hərbçi və mülki vətəndaş həyatını itirib, yüz minlərlə insan isə təhlükəsizlik səbəbilə evlərini tərk etməyə məcbur olub.
Əvvəlki atəşkəs sülh razılaşması isə 2025-ci ilin iyul ayında ABŞ Prezidenti Donald Trampın təşəbbüsü ilə əldə olunmuşdu və daha sonra Malayziyada regional görüşlərdə genişləndirilmişdi. Lakin bu razılaşmaların öhdəlikləri tam yerinə yetirilməmiş və sərhəd boyu kiçik toqquşmalar davam etmişdi.
Yeni atəşkəs həm Tailand, həm də Kamboca üçün sərhəddə gərginliyi azaltmaq, mülki əhalinin təhlükəsizliyini təmin etmək və qarşılıqlı anlaşma üçün diplomatik kanalları açmaq baxımından vacib addımdır.
