Suriya Xalq Məclisi Bəşər Əsəd hakimiyyəti dövründə yaradılmış Terrorla Mübarizə Məhkəməsinin ləğvinə və onun çıxardığı qərarların hüquqi nəticələrinin aradan qaldırılmasına yekdilliklə səs verib.
MSNews.az xəbər verir ki, qərar sentyabrın 16-da parlamentin növbədənkənar sessiyasında qəbul edilib. Məhkəmə 2012-ci ildə yaradılmış və sonrakı illərdə terrorçuluq ittihamları ilə minlərlə suriyalının işinə baxmışdı.
Yeni qanun layihəsi Ali Məhkəmə Şurası tərəfindən xüsusi məhkəmə komissiyalarının yaradılmasını nəzərdə tutur. Bu komissiyalar ləğv edilmiş məhkəmənin qərarlarının nəticələrini aradan qaldıracaq, müsadirə edilmiş əmlakın geri qaytarılması məsələlərinə baxacaq, davam edən işləri isə bağlayacaq və ya aidiyyəti məhkəmələrə göndərəcək.
Əhməd əş-Şaraa hələ 2025-ci ilin iyununda prezident fərmanı ilə həmin məhkəmələrdə çalışmış 67 hakimin vəzifədən uzaqlaşdırılmasını təsdiqləmişdi. Sentyabrda qəbul edilən qərar isə məhkəmənin ləğvini qanunvericilik səviyyəsində rəsmiləşdirir.
BMT-nin İnsan Hüquqları Komitəsi 2024-cü ildə bu məhkəmənin əsas məhkəmə təminatlarını təmin etmədiyini bildirmiş, qanunsuz saxlamalar, işgəncə iddiaları və məhkəmənin müstəqilliyi ilə bağlı narahatlıq ifadə etmişdi.
Ayrı-ayrı məhkumların azad edilməsi və konkret əmlakların geri qaytarılması prosedurunun necə həyata keçiriləcəyi isə mərhələli şəkildə yaradılacaq məhkəmə komissiyalarının fəaliyyəti ilə müəyyənləşdiriləcək.
