Rusiya Prezidenti Vladimir Putin bir sıra ağır cinayətlərə görə məhkum olunan şəxslərin Müdafiə Nazirliyi ilə hərbi xidmət müqaviləsi bağlamasına icazə verən qanunu imzalayıb.
MSNews.az xəbər verir ki, “İnterfaks” qanunun səfərbərlik, hərbi vəziyyət və müharibə dövründə tətbiq ediləcəyini yazır. Dəyişiklik banditizm, cinayətkar birlikdə iştirak, narkotik və silah qaçaqmalçılığı, qanunsuz miqrasiyanın təşkili, nüvə materialları ilə qanunsuz rəftar və dövlət sirri olan sənədlərin itirilməsi kimi maddələri əhatə edir.
“The Moscow Times” bildirir ki, Dövlət Dumasının Müdafiə Komitəsinin üzvü Andrey Kolesnik həmin şəxslərin çoxunun hücum bölmələrinə göndəriləcəyini deyib: “Onların hamısı geri qayıtmayacaq”. Müdafiə Nazirliyi isə onların xüsusi bölmələrdə və gücləndirilmiş nəzarət altında xidmət edəcəyini açıqlayıb.
