Serbiyadan Moskvaya uçan və göyərtəsində ölkənin tanınmış siyasətçilərinin olduğu “Air Serbia” təyyarəsi Litva üzərində geri qaytarılaraq Belqrada endirilib. Hadisəyə sərnişinlərdən biri ilə bağlı təhlükəsizlik yoxlamasının tamamlanmaması səbəb olub.
MSNews.az xəbər verir ki, hadisə noyabrın 3-də JU134 reysi zamanı baş verib. Təyyarədə Serbiyanın keçmiş kəşfiyyat rəhbəri Aleksandr Vulin, “Srbijagas” şirkətinin direktoru Duşan Bayatoviç və siyasətçi Nenad Popoviç olub.
Bu barədə “Reuters” məlumat yayıb.
“Air Serbia” şirkəti sərnişinlərdən birinin əlavə təhlükəsizlik yoxlamasından keçirilməsi zərurəti yarandığını təsdiqləyib. “Nova.rs” portalının məlumatına görə, həmin şəxs məhz Vulin olub və o, ilkin yoxlamadan keçmədən təyyarəyə minib. Lakin aviaşirkət sərnişinin kimliyini açıqlamayıb.
Vulin hadisəni özünə qarşı siyasi təzyiq kimi qiymətləndirib. O, Moskvaya Serbiyanın Rusiya ilə qaz müqaviləsinin uzadılması barədə danışıqlar aparmaq üçün getdiyini və əlavə yoxlama zamanı üzərində qanunsuz heç nə aşkarlanmadığını bildirib.
“Tanjug” agentliyinin noyabrın 4-də yaydığı məlumata görə, sərnişinlər təkrar təhlükəsizlik yoxlamasından keçirildikdən sonra təyyarə yenidən havaya qalxıb və Moskvaya çatıb.
