ABŞ-dan İsrailə minlərlə ton hərbi texnika və nəqliyyat vasitəsi çatdırılıb. İsrail Müdafiə Nazirliyinin məlumatına görə, yük gəmisi Hayfa limanında boşaldılıb və gətirilən texnika İsrail ordusunun quru qoşunlarına təhvil veriləcək.
MSNews.az xəbər verir ki, “The Times of Israel” İsrail Müdafiə Nazirliyinə istinadən partiyaya D9 buldozerləri, “Humvee” avtomobilləri, JLTV zirehli taktiki maşınları, “Oshkosh” yük avtomobilləri və digər hərbi texnikanın daxil olduğunu bildirib. Nazirlik avadanlıqların quru qoşunlarının “əməliyyat hazırlığını və fəaliyyətinin davamlılığını gücləndirmək” məqsədilə gətirildiyini açıqlayıb.
“Jewish News Syndicate” yükün ABŞ-da İsrail ordusu üçün alınmış hərbi texnika və avadanlıqlardan ibarət olduğunu qeyd edib. Partiyadakı D9 ağır buldozerləri “Caterpillar”, JLTV maşınları “Oshkosh Defense”, Humvee ailəsinə aid avtomobillər isə “AM General” ilə əlaqəlidir.
Bu şirkətlərin İsrail ordusuna məhsul tədarükü uzun müddətdir Fələstin tərəfdarı fəallar və insan hüquqları təşkilatlarının tənqid mövzusudur. “Irbak” platformasının şirkətlər kataloqunda “Caterpillar”, “Oshkosh Corporation” və “AM General” hərbi və təhlükəsizlik avadanlığı ilə əlaqəli şirkətlər sırasında göstərilir.
BMT-nin Fələstin əraziləri üzrə xüsusi məruzəçisi Françeska Albanesenin 2025-ci ildə hazırladığı hesabatda da “Caterpillar”ın D9 buldozerlərinin İsrail ordusunun Fələstin ərazilərində həyata keçirdiyi əməliyyatlarda, o cümlədən tikililərin və infrastrukturun dağıdılmasında istifadə edildiyi qeyd olunub.
Bununla belə, fəalların sözügedən şirkətləri “soyqırımda iştirak etməkdə” ittiham etməsi hüquqi məhkəmə hökmü deyil və onların siyasi-hüquqi qiymətləndirməsidir. Buna görə belə ittihamlar şirkətlərin məsuliyyətinin məhkəmə tərəfindən müəyyən edilmiş faktı kimi təqdim edilməməlidir.
