Almaniya kansleri Fridrix Merts bildirib ki, Rusiya və Vladimir Putin üçün real təhlükə NATO və ya Avropa deyil, demokratiyanın cəlbedici gücüdür.
MSNews.az xəbər verir ki, Merts bu fikirləri sentyabrın 9-da Bundestaqda 2027-ci il büdcə layihəsi üzrə keçirilən ümumi debat zamanı səsləndirib.
Merts Rusiyanın Ukraynaya qarşı müharibəsi ilə bağlı çıxışında bildirib:
“Heç kim Rusiyanı təhdid etməyib — nə NATO, nə Avropa İttifaqı, nə də Almaniya. Sizin reaksiyalarınız isə necə düşündüyünüzü açıq şəkildə göstərir.”
Kansler daha sonra vurğulayıb ki, “Rusiya və Putinə həqiqətən təhlükə yaradan yeganə şey demokratiyanın cəlbedici gücüdür”. Onun sözlərinə görə, Ukrayna “Avropanın demokratik ailəsinə doğru irəliləyirdi” və məhz bu proses Putin hakimiyyəti üçün əsas təhlükə təşkil edirdi.
Mertsin açıqlamaları Bundestaqda AfD həmsədri Alis Vaydelin çıxışına cavab olaraq səslənib. Vaydel kansleri Rusiya ilə bağlı “müharibə təbliğatı” aparmaqda ittiham edib və onu sülh danışıqlarına daha fəal çağırış etməyə səsləyib. Merts isə AfD-ni müharibədə “təcavüzkarla qurbanın rolunu dəyişməkdə” ittiham edib.
Kansler Almaniyanın Ukraynaya dəstəyinin davam edəcəyini də bildirib:
“Biz Ukraynanı dəstəkləyirik və dəstəkləməyə davam edəcəyik, çünki o, Avropanın mərkəzində bizim azadlığımızı da müdafiə edir.”
Merts AfD-nin Rusiya siyasətini tənqid edərək partiyanın Moskvanın mövqelərinə yaxın dayandığını bildirib və xarici siyasət, Avropa siyasəti və təhlükəsizlik məsələlərində hökumətlə AfD arasında fundamental fikir ayrılığının olduğunu vurğulayıb.
